Meeqqat Ujarassiorimmi peqataatinniarlugit atuarfinni unammisitsisoqassaaq

Kinguaariinni nukarliunerusut Ujarassiorimmi ilanngutsinniarlugit meeqqat atuarfianni unammisitsisoqassaaq, tassanilu meeqqat atuarfianni atuaqatigiiaat tamarmik qaaqquneqarput.

- Atuaqatigiit karsiannut aningaasanik akissarsititsissaagut, tusagassiuutinut nalunaarummi Naalakkersuisut allapput.

Sapaatip-akunnerani sammisaqarfiusumi unammisitsineq qulequtarineqarpoq: "Ulluinnanni ujarassiornerup sunniutai".

Ujarassiuutitigut tunisassiat digitalikkut ulluinnarni inuunermut ilaaneranut itisiliinikkut, atuartut ujarassiornermik soqutiginnilersinneqassapput:

Elektronikkimi atortuni ujarassiornermit tunisassiat pinngitsoorneqarsinnaanngilluinnarput

- Atuartut ulluinnarni atortorissaarutit elektroniskiusut atortarpaat, soorlu smartphonet tabletillu, qarasaasiakkut pinnguaatit, Youtube Netflixilu, taakkuninngali atuisinnaanissamut suut pisariaqarnersut eqqarsaatigiuaannarneq ajorpaat.

- Tunisassiat atortussiartaanni ujarassiornermit tunisassiat pinngitsoorneqarsinnaanngilluinnarput. Atuartut taakkua atuartitsinermi itisilerlugit paasisaqarfigissavaat, Naalakkersuisut allapput.

Atuartut tunisassiamik ataatsimik toqqaasinnaapput, assersuutigalugu smartphone, aammalu namminneerlutik smartphone sunik sanaajuneranik sukumiisortaat misissorsinnaavaat. 

Atuartut ilisimalikkaminnik saqqummiussissapput, saqqummiussallu akissarsisitsinissamut ataatsimiititaliap nalilersussavai.

Akissarsiassat aningaasartai katillugit 10.000 koruunit ima agguarneqarput:

1. 5000 kr
2. 3000 kr
3. 2000 kr