AMAROQ MINERALS
Kuultisiorfik: Tønnesen HR-imi pisortanngorpoq
Christine Tønnesen Amaroq Mineralsimi HR- aamma ESG-mi pisortanngorpoq, kuultisiorfissamilu sulisoqarnermut atorfinitsitsinermullu akisussaasuulissalluni.
- Christine Tønnesen Kalaallit Nunaanni sulisoqarnermut avatangiisinullu pisortatut nutaatut Amaroq-mut tikilluaqqussallugu nuannaarutigaara. Nalunami kuultisiorfimmi suliat ukioq manna annertusiartortillugit, pikkorissunik nutaanik atorfinitsitsinissaq pingaarnerpaatinneqassaaq. Christinep Kalaallit Nunaanni inuiaqatigiit, pissutsit piujuartitsinerlu pillugit pingaarutilinnik ilisimasaqarpoq, tamannalu uagutsinnut naleqangaatsiarpoq, Joan Plant, Amaroq Minerlasimi executive vice presidentiusoq tusagassiorfinnut nalunaaruteqarluni oqaaseqarpoq.
Christine Tønnesen Pisiffimmi sulisoqarnermut pisortaasimavoq, AQQUT-inilu immikkoortortaqarfimmi pisortaasimalluni. INI-mi aamma sullitanut sullissinermut pisortaasimavoq.
Qilanaartoq
- Nalunami piujuartitsisumik ineriartortitsinerup saniatigut suliffeqarfiup Kalaallit Nunaanni sulisuinik ineriartortitsinissaq qilanaaraara. Nalunami suliniut suliffiuvoq nuannersoq, qularutiginngilaralu suleqatitsinnut periarfissanik, ilinniartitsinermik misigisanillu nuannersunik neqeroorfigisinnaasatsinnik, atorfinittoq tusagassiuutinut nalunaarummi oqarpoq.
Christine Tønnesen Sikuki Nuuk Harbourip siulersuisuini aamma Aalborgimi Kalaallit Illutaanni siulersuisuini ilaasortaasimavoq, pisortat pisiortorneranni naammagittaalliuuteqarfimmi sinniisuusimalluni kiisalu Imiagassaq Ikiaroornartorlu pillugit Siunnersuisoqatigiinni ilaasortaasimalluni.