Kullorsuaq anginerusumik umiarsualivittaassaaq
Kullorsuarmi umiarsualiviup allilerneqarnissaanut aningaasaliisoqarpoq. Umiarsualivik nutaaq 2024-mi ukiakkut atulersinneqarnissaa naatsorsuutigineqarpoq.
Annonse
Kullorsuup umiarsualiviani atugassarititaasunik alliliinissamut aningaasanik atugassiisoqarnissaanik Naalakkersuisut qinnutigisaat, Inatsisartut Aningaasaqarnermut Akileraartarnermullu Ataatsimiititaliaata 2024-mi marlunngornermi martsip 19-iani akuersissutigaa.
Pilersaarutitigut umiarsualivik piusoq allilerneqassaaq, talittarfillu piusoq 0,5 meterinik portulineqassalluni. Pilersaarutitigut umiarsualivimmi sulinermi atugassarititaasut pitsaanerulissapput, najugaqartullu umiatsiaaraat ulerujussuarnernut ilaalu ilanngullugit illersorneqalissallutik.
- Kullorsuup umiarsualiviani nassiussalerineq piffissami sivitsortumi unammillernarsimavoq. Umiarsualivimmi massakkut atugassarititaasut, pingaartumik taartillugu silarlutsillugulu umiarsualivimmi atuisut isumannaassusaannut aarlerinarput.
- Tassunga tunngatillugu innuttaasut misigisimapput, anorersuartillugu talittarfiup oqquunissaa amigaataasoq. Taassumap saniatigut umiarsualivimmi nassiussalerinermi qangaaniilli ilisimaneqarlutik unammillernartut pitsaanerulissapput. Taamaattumik Kullorsuup umiarsualivianik pilersaarut maanna aallartinneqarsinnaanngormat nuannerpoq, Ineqarnermut Attaveqaasersuutinullu Naalakkersuisoq Hans Peter Poulsen tusagassiuutinut nalunaarummi oqarpoq.
Oqquiffissaliornissamut naleqqutinngitsoq
Pilersaarusiornermut atatillugu talittarfimmut atatillugu ujaqqanik oqquiffissaliortoqarsinnaanersoq misissorneqarnikuusoq, Naalakkersuisut ilisimatitsissutigaat. Anorersuartillugu oqquiffiup umiatsiaaqqat sissamiittut illersussallugit siunertarissagaluarpaa.
- Immap itissusaanik misissuineq tunuliaqutaralugu uppernarsarneqarsinnaavoq, ujaqqanik oqquiffissaliorfissatut sumiiffik kissaatigineqartoq itivallaartoq.
Umiatsiaaqqat anorersuarmut illersorumallugit talittarfik meterimik affaanik portunerulersinneqassasoq taamaattumik aalajangerneqarpoq.
- Ataatsimoorussamik attaveqaasersuutitta aserfallatsaalineqartarnerat inoqarfinni minnerni inuunermut kiisalu nunap ataneranut, ineriartortinneqarnissaanullu aalajangiisuupput. Taamaattumik pilersaarutit mannatuulli ittut Naalakkersuisut pingaartitarilluinnarpaat, Hans Peter Poulsen oqarpoq.
Talittarfik nutaaq 2024-p ukiaani atulersinnaassasoq naatsorsuutigineqarpoq.
Kullorsuarmi umiarsualivimmik atuisut innuttaasullu suleqatigalugit pilersaarut suliarineqarsimasoq, Naalakkersuisut ilisimatitsipput.
