Ilisimatusartoq: Danmarkip iliuuseqarsinnaannginnera Kalaallit Nunaata ersersikkaa
Kalaallit Nunaata nunanut allanut periusissiaanik utaqqineq qallunaat iliuuseqarsinnaannginnerannik ersersitsivoq, ilisimatusartuunerup Ulrik Pram Gadip Dansk Institut for Internationale Studierimi allaaseraa.
Annonse
Ilisimatusartuunerup Ulrik Pram Gadip issittumut periusissiornerup issittumullu aallartitamik toqqaanerup qanoq ingerlasimanera misissoqqissaarpaa. Suliaq ukiut pingasut sinnerlugit sivisussuseqarpoq, Kalaallit Nunaatami nunanut allanut politikkertik naammasseqqaarnissaa kimigiiserfigimmagu.
- Utaqqinerup Kalaallit Nunaata Danmarkimut nunanullu allanut pissaaneqarnera ersersippaa, ilisimatooq inerniliivoq.
- Danmarkimut kanngunarsigaluttuinnarpoq nunap immikkoortuanut, namminneq qaninnerpaatut taasimasaminnut, politikkimik saqqummiussisinnaasimannginneq. Allagartap amigaatigisap pissarsiarisinnaannginnerata saniatigut Danmarkimi nunanut allanut ministeriisa taarseraannerat aamma kanngunarsaaqataavoq, Ulrik Pram Gad allappoq
Annernarnerata ersersikkaa
"Kalaallit Nunaata nunanut allanut politikkimut periusissiamik suliaqarnerata erseqqissumik takutippaa Danmarki Kalaallit Nunaat peqataatinnagu Issittumi oqartussaassuseqarsinnaanngitsoq. Utaqqisariaqarnerup annernarnerata tamanna ersersippaa. Danmarkillu Issittumi sunniuteqarsinnaaneranut Kalaallit Nunaat pissutaatuaasoq takutillugu," taassuma naqissuserpaa.
Sulialli ingerlanera ajortumik kinguneqarsinnaasoq tikkuarpaa. Marlunnillu eqqaasaqarpoq.
- Siullertut suliap arriitsumik ingerlavallaarnerata nunanut allanut suleqatigisinnaasanullu Kalaallit Nunaat suleqatissatut pimoorussinngitsunut isigilerneqarsinnaanera. Kalaallit Nunaat periusissialiorsinnaanngitsutut nunanilu tamalaani attaveqarniarnermut piginnaasaqanngitsutut isigineqalersinnaammat.
Iluaqutissartai
- Aappassaanik, Issittumi periusissiaq Issittumilu aallartitaq, suliami tamatumani tigusatut inississimasut, naleerussinnaapput. Pisimasinnaavoq - aamma suli pisinnaavoq. Issittumi Siunnersuisoqatigiit Ruslandip Ukrainemik tiguaaneraniilli unittoorput. Siunnersuisoqatigiit Danmarkip siulittaasuuffimmik 2025-mi maajimi tigusinnginnerani atuukkunnaassappata, issittumut periusissiaqarneq pingaaruteqarpallaarunnaassaaq. Issittumullu aallartitaqarnissaq siunertaarulluinnassalluni. Taamaattoqassappat Kalaallit Nunaat periusissialiornissaminik mulusimanini angusaqarfigissanagu.
Ilisimatuulli erseqqissarpaa Kalaallit Nunaat arlalinnik iluaqutissanik angusaqarsimasoq.
Ulrik Pram Gadsip aviisimut ilanngussaa uani atuaruk
