Arfernik mikinernik illersuiniarluni pisassiissutit atorunnaarsinneqarput
Arferit mikinerit, soorlu niisat, illersorneqarnissaat pillugu Naalakkersuisut nalunaarummik tusarniaaqqipput. Pisassiissutilli atorunnaarsinneqarsimapput, maannalu pisat nalunaarutigineqarluarnerunissaat siunertaavoq.
Annonse
Niisanniarneq piujuartitsinissamut naleqqutinngitsoq siornatigut nalilerneqarpoq— pisaqarpallaartoqartarpoq, Atlantikullu Avannaani Immami Miluumasut pillugit Ataatsimiititaliarsuup, NAMMCO-p, pisassiissutit atorlugit niisanniarneq killileqqullugu inassuteqarsimavoq.
2022-mi 2023-milu niisanut pisassiissutit pillugit nalunaarummik Naalakkersuisut tusarniaassuteqarsimapput. Arferit mikinerit qilalugaanngitsut pillugit nalunaarutaavoq.
Kisiannili immaqa maannamut, ilaatigut niisanut pisassiissuteqartarneq taamaatiinnarneqarunarpoq.
Nalunaarutigineqartartunik pitsanngorsaaneq
Nalunaarut nutaaq pisassiissummik imaqanngitsoq tusarniaassutigineqarpoq:
- Pisassiissuteqarsinnaanermut malittarisassat peerneqarput. Pisaasartut nalunaarutigineqartartut piniariaatsillu pitsanngortinnissaat nalunaarutissami pingaarnertut anguniagaavoq, Aalisarnermut Piniarnermullu Naalakkersuisoqarfik tusarniaaneq pillugu allappoq.
2022-mi niisat 3409-it pisarineqarput, pisassiissutillu 2900-nissaat siornatigut NAMMCO-p siunnersuutiginikuuaa.
Inuit inoqutigiinnilu uumasuutit peqqinnissaat eqqarsaatigalugu, arferit mikinerit akoorutissanik annertuallaamik mingutsinneqarsimasut piniarnissaannut nerineqarnissaannullu inerteqquteqarnissamut Naalakkersuisut nalunaaruteqarsinnaanerannik periarfissaqartitsinissaq, nalunaarutissami tusarniaassutigineqartumi nutaatut ilanngunneqarpoq.
Nalunaarut piviusunngortinneqassappat, arferit mikinerit qilalugaanngitsut pillugit nalunaarutissaq siullerpaajussaaq, Aalisarnermut Piniarnermullu Naalakkersuisoqarfik ilisimatitsivoq.
