Aktiaatillit unioqqutitsillutik taarsigassarsisarnerat Kalaallit Nunaanni takussaavallaarunnaarput

Jim Riis piginneqatigiiffimmi Hotel Qaqortumi piginnittoq aamma pisortaq, siorna unioqqutitsilluni suliffeqarfimminit 200.000 koruunit missaannik taarsigassarsisoq, taamatut pisuni kisiartaanngilaq. Nuummi suliffeqarfik Usisaat siorna inatsimmik unioqqutitsilluni piginnittumut taarsigassarsititsivoq.

Pisuni taakkunani marlunni ingerlatseqatigiiffiit inatsisaannik aamma akileraartarnermut inatsimmik unioqqutitsisoqarpoq. Tamannalu kukkunersiuisumit Per Jansenimit Grønlands Revisionimit naatsorsuutini oqaaseqarfigineqarlunilu nassuiarneqarpoq.

Unioqqutitsilluni taarsigassarsititsisarnerit pillugit ajornartorsiutinik ataatsimut isigalugu oqaaseqarniarpoq, kisianni suliat aalajangersimasut, assersuutigalugu Hotel Qaqortup 2023-mi naatsorsuutai kukkunersiukkani oqaaseqarfigerusunngilai.

Ingerlatseqatigiiffiup aningaasaatai taarsigassiissutigiinnarneqarsinnaanngillat

Unioqqutitsilluni piginnittunut taarsigassarsititsisarnerit ingerlatseqatigiiffiit pillugit inatsimmi inerteqqutaapput, akileraartarnermut inatsit malillugu akileraarnissamut pisussaaffeqarput aamma ernialerlugit akilernissaannut pisussaaffeqarput.

Unioqqutitsilluni taarsigassarsisarnerit, suliffeqarfimmik piginnittup suliffeqarfiup karsiani akileraarnani taarsigassarsisarnerat nalinginnaajunnaarsimasoq, Per Jansen erseqqissaavoq.

- Siornatigutulli inerteqqutaasumik aningaasanik taarsigassarsisitsisarneq Kalaallit Nunaanni nalinginnaajunnaarpoq, Grønlands Revisionimi pisortaq kukkunersiuisorlu oqarpoq.

Aktiaatileqatigiiffimmik piginneqatigiiffimmilluunniit piginnittuugaanni aqutsisuullunilu, ingerlatseqatigiiffimmut taarsigassarsigaanni ajornartorsiortitsisarpoq. Ingerlatseqatigiiffiup aningaasaatai nammineq aningaasaatigineqarlutik taarsigassarsiariinnarneqarsinnaanngillat.

- Ingerlatseqatigiiffinnut aningaasanik taarsigassarsisoqarsinnaanngilaq. Kukkunersiuisutut unioqqutitsilluni taarsigassarsisoqarsimappat naatsorsuutini allattartussaavavut, taanna erseqqissaavoq.

Unioqqutitsilluni aningaasanik taarsigassarsisarnerit pillugit Per Jansen nangilluni ima oqarpoq:

- Danmarkimi Erhvervsstyrelsen digitalimik atortoqarpoq, taamaalilluni inuit taamaaliortarunnaarput. Kisianni ukiuni arlalinni kingumut qiviaraanni, aningaasanik taarsigassarsisarneq nalinginnaasimavoq.

Taamatut taarsigassarsisoqartarnera Kalaallit Nunaanni Danmarkimilu qaqutigoortuummat, suliffeqarfiit amerlanersaasa ukiumoortumik naatsorsuutaat, ukiumoortumik nalunaarusianik taaneqartartut, elektroniskiusumik Inuussutissarsiornermut Aqutsisoqarfimmit nalunaarutigineqartariaqarnerat pissutaavoq.

- Inuussutissarsiornermut Aqutsisoqarfiup ingerlaannaq tamakku misissortarpai, ingerlatseqatigiiffinnut saaffiginnilluni uppernarsaatinik piumasaqarluni. Taamaattumik unioqqutitsinerit tamakku takussaanngillat. Kalaallit Nunaanni piginneqataasunut taarsigassarsiat 90 procentii piaaraluni taarsigassarsiarineqartanngillat, ilaatigut naatsorsuuserisut malinnaaffiginngitsoortarmatigik, imaluunniit pisortap ingerlatseqatigiiffiup mastercardia nammineq atukkaminut atorsimallugu missingersortarpaa, kukkunersiuisoq nassuiaavoq.

Per Jansenip ilanngullugu oqaatigaa Kalaallit Nunaanni pisimasut Danmarkimi pisimasutulli ajortiginngitsut. Tassani suliffeqarfinnik piginnittut nammineq ingerlatseqatigiiffiutiminnut millioninik taarsigassarsisarsimanerat assersuutigineqarsinnaavoq.