Air Greenland timmisartumik nassiussanik assartuinermut aningaasaliivoq

Air Greenland nunani tamalaani suliffeqarfimmik Champimik, nassiussanik aqutsinermi immikkut ilisimasalimmik, isumaqatigiissuteqarluni digitalimik atortorissaarutinik nassiussanik aaqqissuinissamik aqutsinissamillu pisariinnerulersitsisunik atuisinnaalerpoq, ingerlatseqatigiiffik nittartakkamini taama ilisimatitsivoq.

- Cargospotip atortui aamma suut sumut nassiunneqassanersut aqunniarnerannut iluaqutigissavavut, nassiussanillu nassiussinerup ajornannginnerulernissaa qulakkeerlugu. Cargospot allatut oqaatigalugu inuttut ikiortaavoq, sunik tamanik aaqqissuillunilu inuiaqatigiinnut nunarsuup sinneranut attaveqarluarnissaanik qulakkeerinnittutut assersuunneqarsinnaavoq, Air Greenland allappoq.

Cargospotip digitalimik atortorissaarutai nassiussanik allakkanillu suliarinninnermut tamanut iluaqutaapput, nassiussanik tuniniaanermiit, suliarinninnermut, assartuinermut, ujarlernermut, aamma atuisut timmisartuutileqatigiiffiup nassiussanik nittartagaani nassiussaminnik inniminniisinnaassasut nalunaarutigineqarpoq.

Isumaqatigiissut tamanna pissutigalugu “Kalaallit Nunaannut Kalaallit Nunaanniillu timmisartukkut nassiussanik angallassinerup annertusinissaanut periarfissaqarluarluni”, Air Greenland erseqqissaavoq.