Umiarsuit ajornartorsiortut sikumit kaanngartinneqartut
Umiarsuit marluk Ilulissat eqqaanni sikumi nikeriarsinnaajunnaarsimasut Issittumi Sakkutooqarfiup umiarsuaanit Hvidbjørnenimit ikiorneqarput.
Annonse
Umiarsuaq Ilulissat avannaani sikumi ajoqusersimasoq nikeriarsinnaajunnaaqqasorlu pingasunngormat kaanngartinneqarpoq Ilulissallu umiarsualivianut kalinneqarluni.
Issittumi Sakkutooqarfimmi tusagassiisartoq Camilla Schouw Broholm Sermitsiamut taama ilisimatitsivoq.
Umiarsuaq ajornartorsiortoq pillugu Issittumi Sakkutooqarfik sapaatiummat nalunaarfigineqarpoq, nalunaaquttallu akunneri 15-16-it angalareerluni umiarsuup alapernaarsuutip Hvidbjørnenip umiarsuaq Gustav Dalen tikippaa.
Gustav Dalen Hvidbjørnenip sikumit aniguisippaa, Ilulissanilu umiarsualivimmut isumannaatsumut apuullugu.
Kingorna umiarsuup alapernaarsuisup alapernaarsuinini nangeqqittussanngoraluarpaa, kisianni umiarsuaq alla aamma ajornartorsiortoq nalunaarutigineqarmat alapernaarsuinissaq kinguartinneqarpoq.
Umiarsuaq Hvidbjørnenip ornippaa sikulu aserorterlugu, namminerlu ingerlaqqissinnaanngortillugu.
Maanna Hvidbjørnen nakkutilliinerminik nangitsilerpoq Sisimiunullu ingerlaqqaassalluni, tusagassiisartoq ilisimatitsivoq.
