KL

DK

Kalaallit Nunaat aamma EU

Ukiut 39-it matuma siornatigut avissaartoqaraluartoq attaveqatigiinneq attatiinnarneqarpoq

1. februaari 1985-imi Kalaallit Nunaat EU-mi ilaasortaajunnaarpoq. Attaveqaqatigiinneq taamanikkut annertuumik ajornartorsiuteqarfiuvoq. Perianngitsorli nassuerutigineqarpoq imminnut suli pisariaqartittut, taamaattumik attaveqaqatigiinneq iluarsaanneqarpoq ukiullu ingerlanerini ineriartortinneqarluni suleqatigiinneq patajaatsunngortinneqarluni sulilu ineriartortinneqarluni.

Danmarkip EF-imut (maanna EU-jusoq) 1973-mi ilaasortanngorneranut atatillugu nunarput kalitaalluni ilaasortanngortinneqarpoq. Taamaattorli Nunarput EF-mut ilaasortaajumanngilaq. Aninissamik tamaviaarutiginnittoqareersoq innuttaasut 23. februar 1982-mi taasitinneqarput tamatumalu kingorna 1. februar 1985-mi Nunarput EF-mit anivoq. Avissaarneq pileqqaarmat suleqatigiinniarneq ajornartorujussuuvoq, ukiulli ingerlanerini pitsaasumik patajaatsumillu suleqatigiittoqalernikuulluni, maannalu suleqatigiinnerup inerisitaanik EU Nuummi allaffeqalerpoq tallimanngornermi 15. marts 2024-mi ammarneqartussamik.
Jensine Berthelsen
Tusagassiortoq / Journalist

EU-kommissionip siulittaasua Ursula von der Leyen tallimanngornermi unnukkut kingusissukkut Nuummut tikissaaq statsminister Mette Frederiksen peqatigalugu.

Ursula von der Leyenip tikeraarnerani pisussat

14. marts: Nuummut tikinneq

15. marts: Tallimanngorneq ullup qeqqata siorna EU-kommissionip siulittaasuata Naalakkersuisut ataatsimeeqatigissavai. Ataatsimiinnermi ilaatigut silap pissusaata allanngoriartornera, nukissiuutit ataavartut, ilinniartitaaneq ilaalu ilanngullugit suleqatigiit oqallisigissavaat.

10:30 Atsioqatigiinnerup nalliuttorsiutigineqarnera

11:15 EU-p allaffiata pisortatigoortumik ammarneqarnera

Naak Kalaallit Nunaat EF-imit 1985-imi anigaluartoq, Kalaallit Nunaata aamma EU-p attaveqatigiinnerat ingerlaannarpoq aallaqqaammut  aalisarnermut isumaqatigiissutitigut, isumaqatigiissutit taakku aqqutigalugit nunarput aningaasanik pissarsisarpoq nunallu EU-mi ilaasortat aalisagartassanik pissarsisarlutik.

Taamaattorli ukiut ingerlanerini attaveqaqatigiinneq inerisarneqarpoq taamaalillunilu allatigut aamma suleqatigiinnissamik isumaqatigiissutit inerisarneqarlutik, tassani illuatungeriit isumaqatigiissuteqartalerput sammisat aalajangersimasut suleqatigiissutigissallugit, pingaartumik ilinniartitaanermut tunngasutigut suleqatigiinneq aallunneqartarluni.

Silap pissusiata allanngoriartornera pillugu suliniutit oqaluuserineqassapput

Ukiuni qulikkaani kingullerni nunarsuarmioqatigiit takusinnaaleriartuinnarpaat qanoq annertutigisumik inuit silap pissusianik allanngoriartornermut peqataatiginersut, taamaattumillu silap pissusiata allanngoriartorneranut suliniutit suleqatigiinnermi pingaaruteqartutut inissisimalerput. Tamannalu   Ursulap aamma Mettep tikeraarneranni oqaluuserisassanut ilaavoq.

Kalaallit Nunaat Bruxellesimi sinniisoqarfeqarpoq. Taanna 1992-imili pilersinneqarnikuuvoq. Maanna EU aamma Nuuk-mi allaffeqalerpoq, tallimanngornermi pisortatigoortumik ammarneqartussamik.

EU-p Kalaallit Nunaanni aalajangersimasumik inissisimalernissaa Naalakkersuisut Siulittaasuat, Múte Bourup Egede, EU-Kommissionip Siulittaasua, Ursula von der Leyen aamma ministeriuneq Mette Frederiksen isumaqatigiissummik atsioqatigiissapput, EU-p nuummi allaffiata inatsisitigut tunngavigisaanik imaqartumik.

Savalimmiuni aamma tikeraarpoq

Tikeraarnermi nukissiuutinut mingutsitsinnginnerusunut ikaarsaarneq aamma aatsitassarsiorneq oqaluuserisanut ilaassapput. EU aamma Kalaallit Nunaat 2023-mi novembarip naanerani suleqatigiinnissamik isumaqatigiissuteqarput, tamanna piujuartitsisumik aatsitassarsiornerup ineriartortinneqarnissaanut tunngassuteqarpoq.

Nuummut tikeraarneq sioqqullugu Ursula aamma Mette Savalimmiunut tikeraarput. Savalimmiormiut EU-llu nutaamik suleqatigiissutissamik isumaqatigiissuteqarnerat Savalimmiut lagmandiat Aksel V. Johannesen aamma EU-kommissionip siulittaasua Ursula von der Leyen atsioqatigiipput.

samfund inuiaqatigiit
Powered by Labrador CMS