Tupatorneq annikilleriartoq
Ukiup siulianut sanilliullugu 2023-mi tupamik atuisut ikinnerupput, Naatsorsueqqissaartarfiup naatsorsuinerani tamanna takuneqarsinnaavoq.
Tupa nunamut eqqunneqartoq 2022-mi 84.208 tonsinit siorna 81.75 tonsinut appariarpoq.
- Naatsorsorutsigu pujortarneq ataaseq tupamik 1 gram-imik imaqartoq, 2023-mi tupamik eqqussineq inuiaqatigiinnut tamanut naatsorsuutigigaanni, Kalaallit Nunaanni 15-ileereersimasoq ukiumut ullut tamaasa 5,0 pujortarsimassavaa. Tamanna ukiup siulianut sanilliullugu tupamik 0,2-imik annikilleriarneruvoq, assigalugulu annikilleriarneq 3,2 oct.-iuvoq, Kalaallit Nunaanni Naatsorsueqqissaartarfik ilisimatitsivoq.
2020-mi coronap nunarsuarmi tuniluunnera aallartimmalli ukiut tamaasa tupamik atuineq appariartorpoq, nalunaarusiami takuneqarsinnaavoq.
Tupamik atuinerup appariartornera aamma Nunatta Karsianut tupamut akitsuutinit iluanaarutinut sunniuteqarpoq. 2023-mi Nunatta Karsia 177 millionit koruuninik iluanaaruteqarsimavoq, ukiup siuliani 192 millionit koruuninik iluanaaruteqarsimalluni.
Sunoorsit tupallu aggorluakkat eqqussuunneqarnerat kisitsisit nutaat malillugit annertuumik appariarsimavoq. Tassa 2023-mi sunoorsit/tupat aggorluakkat 406 kilo nunatsinnut eqqunneqartoq nalunaarsorneqarsimavoq, ukiullu siulianut sanilliullugu appariangaatsiarsimalluni, tassami 2022-mi 2.761 kilo eqqunneqarpoq.
Nunat tamalaat akornanni timmisartoqarfinni akitsuuteqanngitsunik pisinerit aammalu takornariat, tikeraat piffissamilu aalajangersimasumi sulisartut atuinerat kisitsisinut ilanngunneqanngitsut paasissutissiissutaavoq.