Suliffeqarnerup suiaassutsinut agguataarneqarsimaneranik Naalakkersuisut akiuiniarput

Suiaassuseq apeqqutaatinnagu suliffittaarsinnaaneq Naalakkersuisut qulakkeerniarpaat, taamaattumillu  suliniuteqarfiusussat arfinillit, suliffeqarnerup suiaassutsinut agguataarneqarsimaneranik akiuiniarfiusussat, toqqarpaat.

Taakkua tassaapput ”akissarsiat assigiit”, ”ilinniartitaaneq suliffeqarnerlu”, ”Naligiissitaaneq assigiinngisitaartitsinerlu”, ”erninermut atatillugu sulinngiffeqarneq”, ”suiaassutsit immikkoortillugit missingersuusiortarneq” aamma ”paasissutissat nalunaarsukkat”.

Sulisussaaleqineq aaqqiissuteqarfigineqassaaq

Sulisussaaleqineq suliassaqarfinni tamaginni ajornartorsiutaasoq Naalakkersuisut isumaqarput. Tamanna sulisartunik nunanit allaneersunit tikisitsisoqarnikkut aaqqinneqarsinnaavoq, Naalakkersuisut tusagassiuutinut nalunaarummi allapput.

Aaqqiissutissaq alla tassaavoq inuiaqatigiit tamakkerlugit sulisussarsiorfigineqarnissaannik aporfiusartut aporfiujunnaarsinnissaat. Suliffeqarnermi ilinniartitaanermilu naligiissitaanerup suiaassutsillu siunnerfeqarnerusumik tulleriissaarnerusumillu periaaseqarluta sulissutiginerisigut inuiaqatigiittut aatsaat angusaqarsinnaavugut, Inuussutissarsiornermut Naligiissitaanermullu Naalakkersuisoq Naaja H. Nathanielsen (IA), isumaqarpoq.

- Inuiaqatigiittut naligiinnginnerup akiornissaa kissaatigigutsigu, sooq naligiinnginnerit pilersimanersut paasisariaqarparput. Pissutigalugu naligiinnginneq nammineerluni pilertanngimmat. Suliassaqarfinni arlalinni ataatsikkut suleqatigiikkutta aatsaat, innuttaasut tamarmik naligiimmik periarfissaqalernissaat anguneqarsinnaavoq, Naaja H. Nathanielsen oqarpoq.

Suiaassutsinut isummersortoqassasoq kaammattuutaasoq

Suliniuteqarfinnik arfinilinnik toqqaareernerup kingorna Naaja H. Nathanielsen tamanut kaammattuuteqarpoq:

- Suliffeqarfiit, oqartussat, ilinniarfiit suiaassutsinut isummersussasut Naalakkersuisut kaammattuutigaat. Angutinut arnanullu annertoqqatigiimmik pilerisaarisarneq qularutigineqanngila, suiaassutsit aappaanni ikinnerusoqarnera isummerfigineqassava?

- Angutit arnallu akornanni akissarsiat assigiinngissuteqarpat imaluunniit ajunngitsorsiassat assigiinngitsuuppat? Sulisussaqarniarnerup ilungersuutiginerata nalaani apeqqut tamanna tunngaviusoq siulersuisut oqartussaasullu tamarmik imminnut apeqqutigisariaqaraluarpaat. Ataatsimoorluta nutaamik pitsaanerusumillu siunnerfeqalersinnaaniassagatta tamanna pillugu Naalakkersuisut suleqataarusuttorujussuupput.