PEQQISUTSIMUT ATAATSIMIITITALIAQ
Suliat tamaasa assigiimmik suliarisigit
Spiralilersuisimaneq pillugu Danmark Kalaallit Nunaalluunniit akisussaasuusimanersoq apeqqutaatinnagu, suliat tamaasa assigiimmik suliarineqarnissaat, Inatsisartut Peqqissutsimut Ataatsimiititaliaata Naalakkersuisunut kaammattuutigaa.
Annonse
Arnat akuersititseqqaaratik ilisimanaguluunniit spiralimik ikkussivigitissimasut, aamma Kalaallit Nunaata peqqinnissaqarfiata tiguneqarnerata kingorna, amerlanerunissaat Inatsisartut ilaqutariinnermut peqqissutsimullu ataatsimiititaliaata ernummatigaa.
Naluneqanngitsutut arnat niviarsiaqqallu 1991-ip tungaanut ilisimanagu akuersinatilluunniit spiralimik ikkussivigineqartarsimasut qanoq ingerlariuseqarfigineqarsimanersut, qanoq amerlatiginersut kingunerilu pillugit arlaannaannulluunniit attuumassuteqanngitsumik misissuititsineq maanna ingerlanneqaleruttorpoq. Misissuinerulli kingunerisaanik arnat arlallit ukiuni kingullerni assingusumik pineqartarsimallutik oqartussaasunut saaffiginnillutillu oqaluttuarput.
Arnat assigiinngitsumik pineqarput
1960-ikkunniit 1991-ip tungaanut pisimasut pillugit danskit naalagaaffiat inuit pisinnaatitaaffiinik unioqqutitsinerarlugu arnat 143-t eqqartuussivimmut suliassanngortitsipput. Arnalli ukiuni kingullerni nakorsanit assingusumik pineqartarsimasut taamatut periarfissaqanngillat:
- Arnat misigisimasaminnik suliarinninnissaminnut kiisalu taarsiiffigitinnissamut periarfissaqarsinnaaneq eqqarsaatigalugu ikiorneqarnissamut tunngasutigut assigiinngitsumik pineqarsinnaanerat, ataatsimiititaliap tusagassiorfinnut taama nalunaaruteqarnermini, ernumanartoqartippaa.
- Peqqinnissaqarfiup kimit akisussaaffigineqarnera apeqqutaatinnagu suliat tamaasa assigiimmik suliarineqartarnissaat Naalakkersuisut qulakkiissagaat ataatsimiititaliamit matumuuna kaammattuutigineqassaaq.
Misissuisitsineq 2025-mi majimi naammassineqassasoq naatsorsuutigineqarpoq.
