Sisimiuni meeqqat toqqissillutik ornittagartaassapput

Sisimiuni meeqqat toqqissisimaffigisinnaasaminnik aalajangeeqataaffigisinnaasaminnillu illutaassapput.

Meeqqat Oqartussaaqataanerat peqatigalugit INI A/S, Qeqqata Kommunia peqatigiiffillu Østifterne suleqatigiillutik Sisimiuni meeqqat inuusuttullu atugaat pitsanngorsaaqataaffigerusuppaat.  Ukiuni arfineq marlunni tulliuttuni pitsanngorsaanissamut periusissiussapput. Sisimiuni meeqqat inuusuttullu tamakkiisumik atugaat, meeqqat atuarfiata naammassinissaanut piumassusaat kingusinnerusukkullu ilinniagaqarnissaat eqqarsaatigalugu, pitsaanerulersitsisussamik periusissiussallutik.

Meeqqat kissaataat piviusunngortoq

Meeqqat toqqissisimaffigisinnaasaminnik ornittagaqalernissaat Meeqqat Oqartussaaqataaneranniit kissaatigineqarpoq. Tamanna amigaatigineqartoq meeqqat nammineq naqissuserpaat.

- Meeqqat inuusuttullu namminneq inuunerminnut ilisimasaqarnerpaapput, taamaattumillu Meeqqat Toqqissillutik Ornittagassaat, meeqqat peqatigalugit qitiutillugillu ingerlanneqassaaq – illup ilua qanoq ittuussanersoq suullu sammisassaassanersut eqqarsaatigalugit, aammali aalajangiisoqalernermi meeqqat issiaqataasassapput, INI A/S Qeqqata Kommunialu tusagassiuutitigut nalunaarumminni allapput. 

Meeqqat ilinniarnermut pitsanngorsaaqataassapput

INI A/S Qeqqata Kommunialu naapertorlugit kisitsisit takutippaat, inuiaqatigiinni atukkat unammillernarsinnaasut, meeqqallu atuarfiata naammassinerani ilinniaqqiffissanut ingerlaqqinnissamut piumasaqaataasunut naammassinnittartut killeqarnerat ataqatigiittut, kisitsisillu taakku Meeqqat Toqqissillutik Ornittagassaata pitsanngorsaaqataaffigerusuppaat.

- Meeqqat Toqqissillutik Ornittagassaat tassaavoq illu ornittagaq, pisariaqartinneqartunik, soorlu isumaginninnermi, nerisaqarnermi toqqissisimanermilu, ikorfartuisoq – taamatullu sammisassanik aaqqissuussinermi meeqqat inuusuttullu namminneerlutik aalajangeeqataaffigisassaat. 

- Taakku saniatigut siunissaq isigalugu sammisassat, soorlu ilinniagassanik ikiuineq, oqaatsinik ilinniarneq, nutaanik pilersitsilluni sammisaqarneq, pinngortitami kulturikkullu misigisassat allallu meeqqat naliliinerat naapertorlugu pisariaqartut, annertuumik ukkanneqassapput.

MTO-p meeqqanut isiginnittariaasia MIO-p 2023-2025-mut periusissiaanut meeqqat pisinnaatitaaffiinut annertuumik ukkassinissaat, Naalagaaffiit Peqatigiit Meeqqat Pillugit Isumaqatigiissusiaa malikkumallugu, tulluartuusoq allapput. Taamaattumik MIO MTO-p aqutsisooqataannut ilaavoq. Meeqqat Toqqissisimallutik Ornittagassaat naalisarlugut tassaavoq MTO.