Sillimmatitut qulimigooqartitsineq pillugu isumaqatigiissut sivitsorneqarpoq

Kujataani innuttaasut imaatigut angalaniarnerminni sikumit ajornakusoortinneqarunik qulimiguulimmik angallanneqarnissartik naatsorsuutigisinnaassavaat.

Ineqarnermut Attaveqaasersuutinullu Naalakkersuisoq Air Greenland A/S-imik isumaqatigiissusiorpoq.  Kujataani sillimmatitut qulimigooqartitsineq pillugu massakkut isumaqatigiissutaasup 2024-mi marsip aallaqqaataanit, maajip 31-ata tungaanut sivitsornissaa isumaqatigiissutigaat.

- Qulimiguulinnik sillimmateqartitsisimaneq, sikuunera patsisaalluni siornatigut unammillernartissimasatsinnut iluaqutaasimasoq paasillugu nuannaarutigaarput. 

-Inissat amerlinerisigut angallassineq eqaannerusinnaasimavoq, taamaattumillu ukioq manna Kujataani imaatigut angallatinik, qulimiguulinnillu angalasut piffissaq eqqornerullugu angalasinnaanerusimallutik. Piffissami matumani Kujataani suli sikuutillugu angallassinerup atatiinnarneqarnissaanut, isumaqatigiissummik sivitsuineq tapertaavoq.

Siku ajornakusoortitsisimasoq

Naalakkersuisoq nassuiaavoq 2022/2023-p ukiuunerani sikuunera patsisaalluni, imaatigut angallassineq pillugu kiffartuussinissamik isumaqatigiissutip qaammatini pingasuni atorunnaarsinneqarnera, qulimiguulimmik sillimmateqartitsinissaq pillugu isumaqatigiissuteqarnermut tunuliaqutaasoq.

 Air Greenlandip qulimiguuliutaata allakkanik, nassiussanillu qaavatigut assartuisussanngornermi saniatigut nunap immikkoortortaani ilaasunik angallassinissaq tamaat isumagisussanngormagu, ilaasunik angallassineq unammillernartunik nassataqartoq, Naalakkersuisoq allappoq.

Qulimiguulik periarfissat aappaattut

Angallassinermi ajornartorsiuteqartoqalissagaluarpat, qulimiguullit AS-350-it marluk atuleriaannanngorlugit Narsarsuarmiisinneqassasut isumaqatigiissutigineqarpoq. 

Qulimiguullit taakkua marluk tamarmik immikkut tallimanik ilaasoqarsinnaapput.Taakkununnga billitsit, nalinginnaasumik piumasaqaatit malillugit tuniniarneqassapput, tak. Air Greenlandimik kiffartuussinissamik isumaqatigiissut malillugu, Air Greenlandimi pisortaanerup Jacob Nitter Sørensenip nassuiaatigaa:

-  Sillimmateqartitsinermik isumaqatigiissummik illuatungeriit sivitsuiniarlutik aalajangernerat, isumaqatigiissuteqarnerallu pitsaavoq. Siorna Tunugdliarfik sikummat ingerlatsisinnaasimannginnermi, massakkutullu taamak sikuutillugu Kujataani imaatigut angalasoqarsinnaatinnagu misilittagaqarnermi, silaannakkut angallassinermi inissat amerlanerusariaqarput. 

- Inuiaqatigiinni pingaarutilimmik suliassamik tassannga aalaakkaasumik ingerlatsinermik, pitsaanerusumillu kiffartuussinermik pilersitsisussamik Air Greenland kivitseqataasinnaagami nuannaarutigaa. Neriuutigiinnassavarput piffissami tassani silaannakkut angallassisinnaatilluta sila atoruminartassasoq.

Aallarfissanut billitsit, kiffartuussinissamik isumaqatigiissummi nalinginnaasumik piumasaqaatit malillugit tuniniarneqassapput.