Savilersorluni toqutsisoqareernerani: Isumannaallisaaneq misissuiffigineqassaaq

Aarhus Universitetshospitalimi tarnimikkut nappaatillit immikkoortortaqarfiani isumannaallisaaneq misissoqqissaarneqassaaq, marlunngornermi unnukkut angut 41-nik ukiulik arlaleriarluni savimmik kapineqareerluni toqunerata kingorna.

Taama pisoqarnerata aqaguani Jyllandip qeqqani tarnip nappaataanut napparsimmavimmi pisortaq Tina Ebler taama oqarpoq.

- Pisimasoq peqqarniitsoq alianartorlu tamatsinnut sunniuteqangaarpoq — sulisunut, napparsimasunut aqutsisunullu.

Tupaqqasut

- Napparsimasut sulisullu isumannaatsuunissaat pingaartingaarparput, taamaattumik taamatut pisoqaraangat annilaartitaasarpugut, Ebler oqarpoq.

Angut 41-nik ukiulik toqusoq angutilu 46-nik ukiulik toqutsisimasutut unnerluutigineqartoq immikkoortortat pingajuanniipput, tassani kalaallit napparsimasut uninngatinneqartarmata.

- Politiit misissuipput, ullumikkullu (pingasunngornermi, aaqq.) napparsimasut sulisullu eqqugaasut isumassornissaat pingaarnerpaatipparput, Tina Ebler oqarpoq.

- Tamassuma kingorna nammineq misissueqqissaarneq aallartissavarput paasiniarlugu qanoq pisoqarsimanersoq, pisoqaratarsinnaanissaalu siusinnerusukkut paasisimasinnaagaluarnerlutigu misissussallugu. Maanna ilisimasakka naapertorlugit taama pisoqarsinnaanera siumut ilimatsaatereersimasinnaarpasinngilarput.

Tina Ebler oqaluttuarpoq 41-nik ukiulik saassunneqarnerata nalaani napparsimmavimmi sulisut marluk aamma immikkoortortaqarfimmiissimasut.

- Sakkortuumik aaqqiagiinngittoqartillugu sulisugut akuliuteqqusaanngillat. Pigaartut pisoqarnerani ingerlaannaq takkupput, ajoraluartumilli kingusinaarsimallutik.

Pinartoqartillugu tarnip nakorsaanik oqaloqateqartut

- Pisumi sulisut annilaartinneqarujussuarput, ullumilu kiisalu ulluni tulliuttuni napparsimmavimmi psykologimik najuutissaaq.

- Aamma napparsimasut immikkut nakkutigaagut, taakkumi imminnut ilisarisimalluarput, taamaalillutillu aamma eqqugaasoq pinerluttorlu ilisarisimalluarlugit, oqarpoq.

Siorna ukiakkut Aarhus Universitetshospitalimi tarnimikkut nappaatillit immikkoortortaqarfianni napparsimasoq toquvoq, napparsimmavimmi najugaqaqatimi aaqqiagiinnginnerup kingorna. Aaqqiagiinnginnermi napparsimasoq nakkarluni niaqqumigut annersimavoq, kingorna toqqutigisaminik.

- Misissuinitta politiillu misissuinerisa paasitissavaatigut isumannaallisaanikkut iliuuserisassat sukatertariaqarnerivut, Tina Ebler oqarpoq.

- Allatut iliuuseqarsinnaavugut? Tarnikkut nappaatillit pillugit inatsisit malippagut, taamaattumik qanorluunniit piumasaannatsinnik misissuisinnaanngilagut nalilersuillutalu, kisianni eqqumaffigisariaqartunik ilinniarfigisinnaasatsinnillu misissuisariaqarpugut.

Tina Eblerip pingasunngornermi oqaluunneqarami ilisimanngilaa 41-nik ukiulik aamma 46-nik ukiulik tarnikkut napparsimasut immikkoortortaqarfianni qanoq sivisutigisumik uninngasimanersut.

- Sivisujaamik uninnganikuupput, ilisarisimavakkami, oqarpoq.

Pinerluuteqarsimasut tarnimikkut napparsimasut immikkoortortaqarfianni unnerluutigineqarsimatillutik eqqartuunneqarsimatillutilluunniit misissorneqartarlutillu katsorsarneqartarput.

Angut 46-nik ukiulik Aarhusimi eqqartuussivimmi pingasunngornermi sassartinneqarluni killisiorneqarpoq.