Saniliusut angerlarsimaffeqanngitsunut inissiat akerliutigigaat

Nuummi angerlarsimaffeqanngitsut 15-it maanna misiligutitut angerlarsimaffeqalernikuupput, tassani angerlarsiffeqalernissaminnut ikaarsaariarnissaminnut ikiorneqartussaallutik.

Suliniulli sanilerisaniit akerliuffigineqarpoq, atsiornernillu katersisoqarluni.

- Uagutblok 7-imi 8-milu najugaqartuusugut meeqqeriviup angerlarsimaffeqanngitsunut angerlarsimaffinngornissaanut qinnuteqaat pillugu tusarniaaffigineqarluta allagarsinikuuvugut. Taanna angerlarismaffik ulluinnarni ullaakkut 08.00-miit ualikkut sisamanut taamaallaat sulisoqartartussaavoq. Tassa isumaqarpoq ualikkut sisamaniit ullaakkut arfineq-pingasut tungaanut weekendimilu sulisoqartussaanngitsoq, taama blokkimi najugalik, kinaassutsiminnik isertuussisoq oqarpoq. Kinaassusaa aaqqissuisoqarfimmi ilisimaneqarpoq.

Najugaqartut 75%-ii akerliusut

Suliniut Housing Firstimik aallaaveqarpoq, innuttaasup eqqissisimanartumiinnissaanik aalaakkaasumiinnissaanillu pilersitsinissaq siunertaalluni, piffissami sivisunerusumi aalaakkaasumik najugaqarfigisinnaasaat.

Blokkinili najugallit allat angerlarsimaffeqanngitsut sumiiffigisaminniinnissaat kissaatiginngilaat.

Najugaqartoq atsiornernik katersisoq naapertorlugu akerliulluni atsiornerit 75%-it sinnerlugit katersorsimallugit. Akerliliissut tusarniaarnerup naammassinnginnerani februaarip ulluisa 16-anni Kommuneqarfik Sermersuumut nassiunneqarpoq.

- Kingorna tusagaqanngilagit. Kisianni marsip aallaqqaataataata missaani susoqartoq takuarput. Kommuneqarfik Sermersuup nittartagaani takusinnaasimanngilarput susoqarnersoq sunaluunniit ammarniarneqarnersoq. Nalaatsornerinnakkulli paasivara angerlarsimaffeqanngitsunut sananeqartoq, oqaasissaaruppunga. Taama blokkini najugaqartoq isumaqatanngitsoq oqaluttuarpoq.

Unnuarsiortunut oqarasuaat e-maililu pissarsiarigai

Angerlarsimaffeqanngitsunut angerlarsimaffiit sananeqartut paasigamigit akerliulluni kommunimut allagaqarpoq:

- Kommuneqarfik Sermersuumut paasiniaavunga susoqarnersoq paasiniarlugu, oqarput akerliusut tamarmik e-boksikkut allagarsiumaartut. Ulloq taanna allagarsivugut. Paasivarput nunaminertamut qinnuteqaat akuerineqarsimasoq, angerlarsimaffeqanngitsunut angerlarsimaffiit illoqarfimmi amigaataammata.

- Arlaannik pissusissamisuunngitsumik najugaqartut takusaqarunik tusaasaqarunillu oqarasuaatikkut attavissaat e-mailikkullu allaffissaat tunniunneqarpoq. Isumaqarpoq politiiusaarlutalu marsertuussasugut. 

Angerlarsimaffeqanngitsut atuarfittaassamut meeqqerivimmullu qanittussaanngikkaluarput

Blokkini najugalik atsiornernillu katersisoq isumaqarpoq angerlarsimaffeqanngitsut eqqarissallugit toqqissisimananngitsoq:

- Sooq sanilerisatut tusarniaaffigineqassaagut tusaaneqaratalu. Tassani ilaqutariit, utoqqaat inuusuttullu najugaqarput toqqissisimanatik angerlarsimaffeqanngitsunut saniliunissaminnut. Nutaamik atuarfittaalerpugut meeqqerivittaalerlutalu aamma sanilerisassatsinnik. Angerlarsimaffeqanngitsut angerlarsimaffiat akornannut ilissallugu isumaqanngilaq.

Sermitsiap isornartorsiuineq pillugu Kommuneqarfik Sermersooq attavigaa. Kommuni akissuteqarpoq isornartorsiuineq 

Kommuneqarfik Sermersooq isornartorsiuineq pillugu Sermitsiamit attaveqarfigineqarpoq. Kommunip ilaatigut akissuteqarfigaa isornartorsiuineq ilumoorullugu. Aammali innuttaasut isornartorsiuisut kajumissaarpai aaqqissuussineq nutaaq ammasumik isumaqarfigeqqullugu. Kommunip isornartorsiuineq pillugu akissutaa allaaserisami immikkoortumi kingusinnerusukkut atuarsinnaavat.