Rosing pisortatut atorfinitsinneqarpoq
Emanuel Rosing Aalisarnermut Piniarnermullu Naalakkersuisoqarfimmi pisortanngorpoq.
Aalisarnermut Piniarnermullu Naalakkersuisoqarfimmi ukiorpassuarni pisortaasimasoq Jørgen Isak Olsen, siorna septembarimi soraarsinneqarpoq.
Emanuel Rosing, taamani immikkoortortaqarfimmi pisortaasoq, naalakkersuisoqarfimmi pisortaagallartussatut toqqarneqarpoq, Rosingilu pisortatut atorfinivitsissallugu maanna naalakkersuisut aalajangerput.
Emanuel Rosingip naalakkersuisoqarfimmi pisortatut atorfinitsinneqarnera nuannaarutigalugu Aalisarnermut Piniarnermullu Naalakkersuisoq, Kim Kielsen (S), tusagassiuutinut nalunaarummi oqarpoq:
- Ukiorpassuarni aalisarnermut piniarnermullu tunngasut qanimut suleqataaffiginikuuai, taamaattumillu suleriaatsit ilisimasaqarfigilluarlugit. Pisarnermisut sulianik annertuunik naammassinnittarnini ingerlatiinnassavaa. Suleqatigiinnitta ingerlaannarnissaa nuannaarutigaara, Kim Kielsen oqarpoq.
Naalakkersuisut naapertorlugit Emanuel Rosing 1996-imi Namminersornerullutik Oqartussat Aalisarnermut Pisortaqarfiani fuldmægtig-itut siullermik atorfinippoq.
Aarhus Universitetimi inatsisilerituutut ilinniagaqarsimavoq.
