Qulimiguulimmut aallaasersortoq inissinneqartussanngorpoq

Angut 21-nik ukiulik tallimanngormat Danmarkimi tarnikkut nappaatilinnut napparsimmavimmi uninngasussatut sivisussusileriigaanngitsumik pineqaatissinneqarpoq.

Narsami qulimiguulimmut aallaasersornermini timmisartortartunik marlunnik eqquillunilu ikileereerneranit ukioq ataaseq ingerlareersorlu tamanna pivoq.

Inuit allat marluk igalaaminernit aseqqukunit eqqorneqarput.

Qulimiguulimmut illumullu eqqaaniittumut inunnik pingasunik qaavani sulisulimmut aallaasersorsimalluni unnerluutigineqartoq nassuerpoq.

Aallaasersorneq sioqqullugu kamarujussuarsimalluni eqqartuussivimmi nassuiaavoq.

Ilisarisimasanilu oqqatsillutik pissutsit ajornerulersimapput.

Politiit naapertorlugit aallaammik ullut marluk tamatuma siorna aalisariummit tillissimasaminik aallaasersorpoq.

Eqqugaasut ilisarisimanngikkai

- Aallaasersunngilaarninni eqqarsarpunga Narsami innuttaasut tamaasa kamassannik tutsitsiviginiarlugit, eqqartuussivimmi unnerluutigineqartoq oqarpoq.

Inuit aallaasersorfigisani ilisarisimalluarnagit nalaatsornerinnakkut aallaasersorfigisimallugit oqarpoq.

Pissutsit pillugit eqqartuussineq tallimanngornermi ullaap tungaani, Aarhusimi eqqartuussivik suliap suliarineranut atorlugu, Kalaallit Nunaanni eqqartuussivik eqqartuussivoq.

Unnerluutigineqartoq Aarhusip eqqaani Skejbymi tarnikkut nappaatilinnut immikkoortortaqarfimmi tigummigallarneqarmat tamanna pivoq.

Eqqartuussisoq ataaseq, eqqartuussisut inuinnaasut marluk, illersuisoq unnerluussisussaatitaasorlu Kalaallit Nunaanneersut ataasinngormat suliaq aallartittoq suliariniarlugu timmisartumik tikisinneqarput.

Tarnimigut napparsimasoq

KNR naapertorlugu unnerluutigineqartoq pinerluttuliornermi nalaani tarnikkut nappaateqarsimasoq toqutserusunnermillu takorluugaqarsimasoq, nakorsap misissuinerata takutippaa.

Tusagassiivik naapertorlugu angut meeraanermini sumiginnagaasimasoq, suliap ingerlanerani paasinarsivoq. KNR naapertorlugu angut 17-inik ukioqarluni inissiisarfimmut nammineerluni inisseqqusimavoq.

Inuit pinerluuteqarnerminni tarnimikkut napparsimasimasut pillarneqarneq ajorput, kisianni tarnikkut nappaatillit napparsimmavianni katsorsarneqarnissamut eqqartuunneqartarput.

Angut kalaaleq sivisussusileriigaanngitsumik inissinneqarpoq, inissinneqarneralu allanngortinneqassappat atorunnaarsinneqassappalluunniit, eqqartuussivik tamanna pillugu aalajangiisariaqarpoq.

Eqqartuussut akuerigaa

Eqqartuussut oqaatigineqarmat angut 21-nik ukiulik eqqartuussissuserisumi saniani tatitulluni issiavoq.

Ulluni eqqartuussiffiusuni allanitulli teqqiaq qorsuk atorpaa, eqqartuussisullu eqqartuussut atuarmagu teqqiani peerpaa.

Eqqartuussisup angut inuusuttoq toqqaannartumik ima oqarfigaa: "Iliuuserisimasat ilungersunarluinnarpoq, eqqugaasullu inuunertik naallugu ikilerneqarput."

- Qujanartumik Kalaallit Nunaanni aallaasersornerit qaqutigoortuusarput, neriuppungalu assingusumik pinerloqqinnginniassagavit maanna eqqortumik ikiorneqarumaartutit, oqaatsit nutserisumit kalaallisuumit qallunaatuumut taama nutserneqarput.

Eqqartuussineq naammassineqareersoq eqqartuussut suliareqqitassanngortinneqassanngitsoq, eqqartuussissuserisuata ingerlaannaq nalunaarutigaa.

/ritzau/