KIGUTILERINEQ
Qanermut scanneri nunatsinni siullerpaaq
Nuummi qitiusumik kigutileriffik nutaaliaasumik CBCT-scanneritaarpoq, taanna iluaqutigalugu alleqqukkut, kiinnap saarngisigut, qinngakkut alleqqullu sulluisigut nappaateqarsinnaanermik pilertornerusumik naliliisoqarsinnaanngorpoq.
Nuummi qitiusumik kigutileriffik, nutaaliamik qanermi saanernik sukumiisumik assiliisinnaasumik CBCT-scannerertaarpoq.
Taanna iluaqutigalugu alleqqukkut/kiguserfitsigut, kiinnap saarngisigut, qinngakkut alleqqullu sulluisigut nappaateqarsinnaanermik naliliisinnaaneq pisariinnerulerpoq.
Sekuntit qulit atorlugit scannertinneq nappaateqarsinnaaneq kigutitigullu ajornartorsiuteqarnerup pissutai takugasuarneqarsinnaalerput
- 3D-mik scannertinneq annernanngilaq – assilisinnerlu sekuntinik quliinnarnik sivisussuseqarluni, kigutilerisut qullersaat Helena Holm iluarisimaarinnilluni oqarpoq, nangipporlu:
- Teknologi nutaaq taanna atorlugu kigutit qiversimarngi sinaallu tamaasa takusinnaassavagut. Tamatuma saniatigut unammilligassanik annertuunik- soorlu saarngit naffaannik- erlippaat kilorliit ajornartorsiutitallit kigutillu manngui- ersarissumik assilisinnaassavagut. Naatsumik oqaatigalugu 3D-scanneri kigutileritittussanut iluaqutaasumik, eqqortumik nakorsaanissamut pitsaanerusumik tunngavissiissaaq.
Kigutileriveqarfik aatsaat 3D-cannereqalerpoq – taannalu Nuummi februaarip naggataani ikkussorneqarluni.
Peqqissutsimut Naalakkersuisoq, Agathe Fontain oqaaseqartinniarlugu Sermitsiap nittartakkatigut nutaarsiassaqartitsivianit sulissutigaarput, ilaatigut paasiniarlugu sinerissap sinnerani qitiusumik kigutileriffeqarfiit scannerinik pilersuinissamut pilersaaruteqartoqarnersoq .