ANINGAASAQARNERMUT NAKKUTILLIISOQARFIK
Piumasaqaatit nutaat aningaaseriviit taarsigassarsisitsisarnerannut sunniuteqarsinnaapput
Aningaasaqarnermut Nakkutilliisoqarfimmi tusarniaanerit iluatsinngitsuussappata realkreditinstitutinut, minnerunngitsumillu Banknordikimut Grønlandsbankenimullu, nunami maani inissianik attartortittakkamut imaluunniit inuussutissarsiutigalugu attartortittakkamut taarsigassarsiniarnissaq ajornakusoornerusinnaavoq akisunerulerluniluunniit.
Annonse
Ataatsimut isigalugu niuerfiup kaaviiaartitai, aningaasat ingerlaarsinnaasut assigiinngissutaallu naammanngitsutut nalilerneqarmata, Savalimmiuni Kalaallit Nunaannilu ineqarfiusunik niuerfiusunilluunniit ineriartorluarsimasumik inissisimasoqanngitsoq, Aningaasaqarnermut Nakkutilliisoqarfik naliliivoq.
Illunut taarsigassarsiat pillugit aningaaseriviillu annaasaqarsinnaanerat pillugu maannakkut suliaq tusarniaassutigineqarpoq, ukioq mannalu kingusinnerusukkut, aasaaneranilu sulinngiffeqannginnermi suliaq aalajangiiffigineqassasoq naatsorsuutigineqarpoq.
Aktiatilinnut isertitat appasinnerusut
Aningaasaqarnermut Nakkutilliisoqarfiup nalunaarutaa Banknordik-ip aktiatiliutaanut kinguneqareersimavoq, aningaaseriviup iluanaarutinit akiligassani annikilleriartissimammagit.
80 millionit koruuninik iluanaarutinit akiliinissaq Banknordik-imi siulersuisut siunnersuutigaat, Aningaasaqarnermullu Nakkutilliisoqarfiup tusarniaaneranut innersuussillutik ima allallutik:
- Iluanaarutit sinneqartoorutit 26 procentiinut naleqqiullugit annertunerupput, taamaalillunilu 70 procentinik iluanaarutinik tunniussisarnissamik politikkimit allaanerulluinnarlutik.
Grønlandsbankenip iluanaarutit aktiamut ataatsimut 20 koruuniniit 55 koruuninut qaffassimagaluarai, aningaaseriviulli iluanaarutit apparteqqissimagai, namminerlu aningaasaatit aningaaseriviup anguniagaanit amerlisimagai, Grønlandsbankenimi pisortaq Martin Kviesgaard Sermitsiaq.AG-mut oqarpoq. Tamanna mianersorluni iliuuseqarneruvoq.
Pissutsit pitsaanerulernissaat neriuutigineqarpoq
- Aningaasaqarnermut Nakkutilliisoqarfimmut akissuteqarpugut, nakkutilliisullu qanoq aalajangiissanersut utaqqivarput. Oqareernittut qanoq inerneqassanersoq ilisimanngilara, Aningaasaqarnermullu Nakkutilliisoqarfiup naliliinera nalileeqqaarneranit sakkukinnerussasoq neriuppunga. Taamaanngippat aktiatillit iluanaarutaat eqqugaaginnassanngillat, aammali Kalaallit Nunaanni taarsigassarsinissaq ajornakusoornerussaaq akisunerussallunilu, Martin Kviesgaard naliliivoq.
Aningaasaqarnermut Nakkutilliisoqarfiup nalunaarusiaani oktobarip 12-ianni allassimasumi Kalaallit Nunaat pillugu ima inerniliisoqarpoq:
- Kalaallit Nunaanni aningaasat pigisanik qularnaveeqquteqartumik qulakkeerneqartut qanoq annaasaqartigisimanersut isertuunniarneqarnissaat pissutigalugu, tamanut saqqummiunneqarsinnaanngilaq.
Ilanngussaq 3 tunngavigalugu Kalaallit Nunaanni inissianik inuussutissarsiutinillu niuerneq ineriartorluarsimallunilu tunngavilerneqarsimanersoq, Aningaasaqarnermut Nakkutilliisoqarfiup uppernarsarsinnaanngilaa.
