Pituttorsimanngitsoq aamma Katersuuffiusoq
Tusagassiorfiup Sermitsiap nittartagaq nutaaq atuisunik qitiutitsisoq ullumi saqqummersippaa. Nutaarsiassaqartitsinissaq, kulturikkut ullutsinnilu pisunik atuisunut attatiinnarumallugu taamaaliorpugut.
Pituttorsimanngitsoq aamma Katersuuffiusoq nittartakkami nutaami pingaarnertut naleqartinneqarput.
Atuisugut pituttorsimanngitsunik nutaarsiassaqartinnissaat taavalu inuiaqatigiiusugut akornatsinni katersuuffiusunik atuagassaqartinnissaat anguniarlugu taamaaliorpugut.
Taamaammat aviisit Sermitsiaq, AG Atuagagdliutit aamma Nuuk Ugeaviisi ullumimiit nittartakkami ataatsimut atuarneqarsinnaalissapput: Sermitsiaq.gl.
Aviisinit taakkunannga pingasunit pitsaanerpaat ataatsimoortillugit nutaamik ilusilerlugit ilisarnaammik sanavugut. Tusagassiorfiup anersaava saqqummeriaasialu ataatsimut nutaanngortillugu ilusilerlugu.
AG-p naqinneri ilisarnaatitsinnut ilanngunneqarput naqinnermilu S-imi qalipaataa tungujortoq erseqqissumik uummarissaqqitatut takuneqarsinnaavoq. Nuuk Ugeaviisip ilisarnaataa qalipaat qorsuk allaaserisat ilusilersornerinut ilanngunneqarpoq.
Aviisit tusagassiorfiillu nunarsuaq tamakkerlugu tatisimaneqarput. Aviisit quppersakkat ussassaarutinit aningaasalersugaasarnikugaluartut internetsip pilersinneqarneratigut, maannalu inuit naapittarfiini teknologiimillu suliffissuarnit annernit, unammillerneqarmata. Taamaammat aviisit pileqqaarfiannut uterluta nutaarsiassaat imarisaanillu allanik atuisunut akiliisitsisarneq atuutilerpoq.
Nutaarsiassaativut allaaserisallu atuarniarukkit atuisutut akiliuteqarnissat piumasarineqassaaq. Mobiilimi, Ipad-imi qarasaasiannilu tamanna pissaaq, atuisutullu akileereeruit nutaarsiassaativut, allaaserisavut allallu nittartakkami Sermitsiaq.gl-imi tamakkiisumik iserfigisinnaalissavatit.
Qaammat siulleq allaaserisat tamarmik akeqanngitsumik atuarneqarsinnaaqqaariarlutik akileeqqaarluni atuarneqarsinnaasut kingorna ilisarnaasersorneqassapput. Taamaaliornikkut takujuminarsissaaq allaaserisat suut akileeqqaarluni atuarneqarsinnaanersut.
Aviisit naqitat AG Atuagagdliutit, Sermitsiaq aamma Nuuk Ugeavis suli pisiarineqarsinnaassapput pisartagarineqarsinnaallutillu.
Nittartagaq nutaaq kusarnarluinnarpoq, nutaajuvorli. Suulluunniit nutaajutillugit iluarsisassaqartarmata, ulluni tullerni ilursisassaqartassasugut naatsorsuutigineqarsinnaavoq.
Tusagassiorfik Sermitsiaq.gl sinnerlugu tikilluaqqullusi.
In.In.
Masaana Egede – Pisortaq aaqqissuisuunerlu
Sermitsiaq.gl