Piffissaanngitsumi qinersisoqarnissaa borgmesterit allat aamma kissaatiginngilaat
Siusinaarluni qinersisoqassappat kommuunit suliaanut kingunerlussasoq, borgmesterit, tassa Ane Hansen, Kommune Qeqertalimmi, Avaaraq Olsen, Kommuneqarfik Sermersuumi kiisalu Stine Egede Kommune Kujallermi isumaqarput.
Piffissaanngitsumi qinersinissaq polikkikkut kissatigineqaleraluttuinnarpoq. Tamannali kissaat kommunini borgmesterit kissaatiginngilluinnarpaat.
Kommune Kujallermi borgmesteri Stine Egede (IA), Kommune Qeqertalimmi Ane Hansen (IA) kiisalu Kommuneqarfik Sermersuumi Avaaraq Olsen (IA) Qeqqata Kommuniani borgmesterip Malik Berthelsenip (S) nalunaarutaa ilalerpaat.
Kingunerlussaaq
Piffissaanngitsukkut qinersisoqassappat inatsisiliat suliallu innuttaasut sullinneqarnerannut atugaannullu pingaaruteqartut kommunit Naalakkersuisullu akornanni ingerlanneqartut kinguarsaqqinneqalissasut ilaannilu maangaannartinneqassasut, taakku oqaatigaat.
- Qularutissaanngilarlu tamanna ilaatigut aningaasanik atuilussinnarnermik immaqalu atuinerusariaqarnermik kinguneqassasoq, suliat ilaat aallaqqaataaneertariaqassappata.
- Suliat angisuut Naalakkersuisunik suleqateqarluta ingerlatavut iluarisimaarpagut, suli ukioq ataaseqsulianut ilusileriikkanut siunissamilu pingaaruteqartussanut sulinissaq pisariaqarteqaarput. Suliassaqaqaagummi, borgmesterit pingasuusut oqaatigaat.
Iluarinngisat partiip iluani aaqqinneqartarniarlik
Borgmesterit kajumissaarutigaat qinikkat isumaqatigiinngissutitik naammagittaalliuutillu partiip iluani siulersuisut aqqutigalugit aaqqinneqassagaat.
- Qinikkatut iluarinngisaqaraanni partiip iluani aaqqitassat siulersuisut aqqutigalugit aaqqinneqartarniarlik. Qinikkatut anguniagaqartilluni tamatigut iluatsitsineq ajornaqaaq, amerlanerussutillit aaliangiisuusarmata. Isornartorsiuviniaraannilu pingaarpoq tunngavilersuutit ersarissut saqqummiuttarnissaat.
- Inassutiginaqaaq inuit ataasiakkaat pissaaneqarusunnerat tunulliutilaarlugu nukiit sulianut innuttaasullu atugaannik pitsanngorsaatissanut siunertaqartunut atoqqullugit, innuttaasut siunissamut patajaannerusumik toqqammavilerneqarnissartik ataasiakkaat pissaaneqarusunneranniit pisariaqartinneruaat, borgmesterit naggasiillutik allapput.
