Pelep Inatsisartut ataatsimiinnissaannut qaaqqusissut  naammaginngilaa

Inatsisartut Siulittaasoqarfiata partiit siulittaasui marsip 15-iani ataatsimiigiaqquai, tassanilu ataatsimiititaliani ilaasortat 60-iniit 40-nut ikilineqarnissaat siunnersuutigineqarpoq. Ataatsimiititaliat ilaat aamma atorunnaarsinneqarlutik suliassaqarfiit ataatsimiititalianut allanut nuunneqarnissaannik pilersaaruteqartoqarnera saqqummiunneqarluni.

- Suleriuseq malillugu Inatsisartuni Ilaasortat kisimik suleriusiminnik aaliangiussisarnerat erseqqissaassutigissavara, Naleqqap siulittaasua Siulittaasoqarfimmut taama saaffiginnippoq, nangipporlu:

- Tassungalu atatillugu ukiuni kingullerni partiit ataasiakkaarlugit ataatsimeeqatigineqarniartarnerata iluarineqannginnera, taamaammallu Inatsisartut ataatsimoorlutik allannguinissamik siunnerfeqarlutik seminarernikuusut erseqqissaassutigissavara, Pele Broberg allappoq.

Siulittaasoqarfik "ilaasortanut tamanut, Nalerarlu eqqarsaatigalugu partiip inatsisartuni ilaasortaatitaasa siulittaasuannut Jens Napaattuumut" attaveqartaqqullugu taassuma kaammattuutigaa.

Siumut aamma naammaginninngilaq

Naleraq kisimiinngilaq nutaamik suleriuseqalernissamik piumasaqartoq. Najaaraq Møllerip, Siumut sinnerlugu Inatsisartuni ilaasortap, tupigusunnini Siumup nittartagaani aamma oqaatigaa: "Tupinnarporlu suleriaaserineqartussatut qinikkat namminneq akuersissutigisimasaat politikikkut siunnerfinnik aporfilersuisuummat," allappoq.

Inatsisartut ataatsimiinnissaanut oqaluuserisassanik siunnersuuteqarniarnerup ajornakusoortarnera Pele Broberg assigalugu Najaaraq Møllerip eqqarsarnartoqartippaa.

- Sualuppoq massakkut siunnersuutinik sisamaasunik siunnersuusiorama, taakkunanilu ataasiinnaq upernaamut ataatsimiinnissamut akuerineqarluni. Itigartitsisimanermut tunngavilersuutigineqartut aammalu Inatsisartoqarfimmi sulinerat apeqquserujussuarpara. Minnerunngitsumik Suleriaaseq Pillugu Ataatsimiititaliaq uani siornaakkunnili allannguutissatut suliarineqartut sumut killinneraat aammalu taakku suliarineqarnersut apeqquserusuppakka, Siumumi politikeri 2022-mili sinniisuulluni ilaasortaasimasoq oqarpoq.

Mimi Karlsenip ataatsimiigiaqqusissutaani ataatsimiititaliat taakkunanilu ilaasortat amerlassusaasa allanngornissaat kisimi oqaluuserineqarpoq. Inatsisartunut ilaasortat siunnersuutiminnik oqaluuserisassanngortitsiniartarneranni piumasaqaatinik naammassinninniarneranni unammilligassaat pineqarani.

Siulittaasoqarfimmut apeqqutit

Siumumit ilaasortap Siulittaasoqarfik ima apeqquteqarfigaa:

• Suleriaaseq Pillugu Ataatsimiititaliap siornaak Hotel Hans Egedemi isumasioqatigiissitsinerani suliat sumut killippat?
• Suliarineqarpat? 
• Suut allannguutissat suliarivaat?

- Apeqqusernartorujussuuvoq Inatsisartut allattoqarfiat qanga oqartussaaninngortinneqarsimanersoq? Sooq Inatsisartut apeqqutini siunnersuutigineqartuni politikikkut oqaloqatigiinnissat apeqqusersorneqarpaluttarpa? Sooq siunnersuusiunngillat qanoq pitsaasumik allanngortissinnaasut, Inatsisartut apeqqutini politikikkut sammivilersuilerniassammata? Sooq imminnut pisussaaffilinngillat siunnersuutiginiarneqartut siuarsarnissaanut pisussaaffeqarnerminnik?, Najaaraq Møller allappoq. Inatsisartut akimmiffissalersorneqarnertik pissutigalugu sulerusussuseerussinnaasarnerannik kinguneqartartoq ilanngullugu mianersoqqussutigaa.