Pelemit isornartorsiorneqarnini pillugu Mimi imminut illersorpoq
Naleqqap siulittaasua Pele Broberg Siulittaasoqarfik pillugu isornartorsiuineranut, Mimi Karlsen siuttoralugu Inatsisartut Siulittaasoqarfiat imminut illersorpoq, Pelemi isumaqarpoq oqaluuserisassanut ilanngussinissaq ajornakusoorpallaartoq.
Annonse
Ataatsimiinnerni siunnersuutit sorliit oqaluuserineqassanersut naliliisoqartillugu Siulittaasoqarfik partiimut attuumassuteqanngitsuusoq, Inatsisartut Siulittaasuata erseqqissarpaa. Piffissarli tunniussivissaq eqquutsinneqassasoq erseqqissarneqarpoq.
- Taamaalilluni Naalakkersuisunit ilaasortanillu siunnersuutinik tunniussinissamut killissarititaq qaangiukkaangat atortussat tiguneqartut, taakkulu suleriaatsimi peqqussutaasutut ulloq 1. marts nal. 12.00 tunniussinissamut killissarititaasoq eqqorlugu tunniunneqarsimanersut Siulittaasoqarfiup nalilersortarpai, siulittaasoq oqarpoq imalu nangilluni:
- Tamatuma saniatigut ilusissanut piumasaqaatinik tamanut atuuttunik siunnersuutit tiguneqarsimasut naammassinnissimanersut tamaasa siulittaasoqarfiup misissuataartarpai.
- Taamaalillutik ataatsimiinnissaq sioqqulluarlugu siunnersuummik inaarutaasumik, tassa siunnersuutit amerlanerit pisarnerattut teknikikkut misissuataagassaanngitsumik, nassiussaqarnerlutik paasissutiginninnissaminnut ilaasortat piffissaqarluartarput. Siunnersuutit nassiunneqartut eqqortuunissaat, taamatullu aamma ilusissanut piumasaqaatinik naammassinnissimanissaat piffissamillu tunniussivissamik eqquutsitsinissaat, ilaasortat namminneq akisussaaffigivaat.
Siunnersuutit tamarmik assigiimmik suliarineqartarput
- Siunnersuutit eqqortumik tiguneqarsimasut tamarmik ilusissanut piumasaqaatinik naammassinnissimanissaat, inaarutaasumillu siunnersuutaanerat erseqqissumik paasissutissiissutigalugu nassiunneqarsimanissaat, piffissaliussarlu eqqortillugu nal. 12.00 tunniunneqareersimanissaat siulittaasoqarfiup qularnaarsimasariaqarpaa.
- Taamaalilluni ilaasortanik partiinilluunniit assigiinngisitsinani siunnersuutit tamaasa assigiimmik Siulittaasoqarfiup suliarisarpai . Siunnersuutit oqaluuserisassanut ilanngunneqarnissaminnut ilusissanut piumasaqaatinik naammassinnissimanngitsut itigartinneqarsimanerinut tunngavilersuutitalimmik ilaasortat taamaalillutik aamma allaffigineqartarput, tamatumunngalu ilanngullugu itigartitsineq tamatumunnga pissutissaqalersitsippat siulittaasoqarfimmut naammagittaalliuuteqarlutilluunniit oqaaseqaateqaqqullugit ilaasortat qinnuigineqartarlutik, Inatsisartut siulittaasuat paasissutissiivoq.
Itigartitsisarneq qaqutigoortuunngilaq
Siunnersuutit akuerineqartannginneri qaqutigoortuunngitsoq Mimi Karlsen oqarpoq," taamaattoqartilluguli ataatsimiinnissamut aggersumut siunnersuutip saqqummiunneqaqqinnissaanut ilusissanut piumasaqaatit naammassineqarsimanissaat qularnaassallugu ilaasortat periarfissaqarluartarput. Tamanna Naleqqamut aamma suli periarfissaavoq."
