Partiimut allamut nuuttoqaqqereernerata kingorna Mette Frederiksenip amerlanerussuteqarneq aarlerinarsorinngilaa

Venstrep folketingimi ilaasortaatitaata Mads Fuglede-p Danmarksdemokratinut nooreernerata kingorna, ministeriunerup Mette Frederiksenip Danmarkimi naalakkersuisut isumannaatsuunissaat ernumaginngilaa.

- Arlalinnik ernumassuteqarpunga, ingammik Ruslandimut tunngatillugu, Danmarkimili inatsisartuni pissutsit ernumaginngilakka, Mette Frederiksen marlunngormat ualikkut oqarpoq.

Marlunngormat ullaakkut partiimut allamut nuussimalluni Mads Fuglede nalunaarpoq.

Taamaalilluni Danmarkimi naalakkersuisut amerlanerussuteqarunnaarput.

Atlantikup avannaani ilaasortat ilanngunnagit naalakkersuisut maanna 86-inik ilaasortaatitaqarput, illuatungiliuttut 87-inik ilaasortaatitaqarlutik.

Attaviitsorli Jon Stephensen taaseqataanissamut Danmarkimi naalakkersuisut isumaqatigiissuteqarfigisimavaat, taassumalu Danmarkimi naalakkersuisut 87-inik ilaasortaatitaqalersippai.

Taamaalillutik Danmarkimi naalakkersuisut nunap iluani politikkikkut amerlanerussuteqarunnaarput.

Tamannali Danmarkimi naalakkersuisut sulinerannut sunniuteqassanngilaq, Mette Frederiksen oqarpoq.

- Soorunami partiit ataatsimoortikkusuppavut, kisianni nunamut eqqortuusorisarput kisiat politikkikkut ingerlassinnaanngilarput, Mette Frederiksen oqarpoq.

- Naalakkersuisut amerlanerussuteqartut atorlugit inatsisit akuerinissaat tunngavigisimasuugutsigu allatut misigissagaluarlunga isumaqarpunga. Taamatut sulisarniarluta qinernikuunngilarput. Akerlinganilli. Folketingimut saaffiginnittuaannarnikuuvugut.

Danmarkimi naalakkersuisut isumaqatigiissutigisatik tamaasa minnerpaamik partiimik ataatsimik allamik – amerlanertigut talerperlernik saamerlernillu – isumaqatigiissuteqarfigisaraat ministeriunerup erseqqissarpaa.

Siunissami isumaqatigiinniarnerni Danmarkimi naalakkersuisut maniguunnerunissaannik neriuuteqarnerminnik erseqqissaaniarlutik partiit arlallit periarfissaq atorpaat, Danmarkimimi naalakkersuisut namminneq aalajangiinerminnik sunniiniarlutik sioorasaarisinnaajunnaarmata.

Danmarkimi naalakkersuisut taamaaliorsimanngitsut, Mette Frederiksen isumaqarpoq.

Aammali politikkikkut isumaqatigiinniarnernut taamatut isiginnittaaseqarneq eqqortuunngitsoq isumaqarpoq.

- Christiansborgimi isumaqatigiissuteqartoqaraangat nammineq soqutigisat eqqarsaatigalugit isumaqatigiissuteqartoqarneq ajorpoq, Danmarkili eqqarsaatigalugu isumaqatigiissuteqartoqartarluni. Taamaattumik partiit tamarmik isumaqatigiinniarnernut peqataasussat Danmarkimut pitsaanerpaaq kisiat eqqarsaatigalugu isumaqatigiinniassasut neriuutigaara, oqarpoq.

Aamma qinersisoqarnissaanik nalunaaruteqarnissamut ministeriunerup illarluni pissutissaqannginnerarpaa.

- Soorunami Danmark qinersisitsissanngilaq. Naalakkersuisut ingerlalluarput, Mette Frederiksen oqarpoq, marlunngormallu meeqqat atuarfiat pillugu isumaqatigiissummut nutaamut innersuussilluni.

Aamma naalakkersuisut Mike Fonsecamik taaseqataanissamut isumaqatigiissuteqarniarpasinngillat, Jon Stephensenimut isumaqatigiissuteqarnermisulli.

- Mike Fonsecamik taaseqataanissamik isumaqatigiissuteqartoqanngilaq. Fonseca oqaloqatiginikuunngilara, Mette Frederiksen oqarpoq.

/ritzau/