Siumut:
Napparsimasut illersuisoqalissasut kissaatigineqartoq
Nunatsinni napparsimasut illersuisoqalernissaa Siumup kissaatigaa. Taakku isumaqarput napparsimasut ilaqutaasalu atugaat illersuisoqalernikkut qaammarsaavigineqarsinnaalissasut.
Napparsimasunut illersuisoqalissasoq Siumup kissaatigaa.
Inatsisartut maajip ulluisa aappaanni upernaakkut ataatsimiinneranni Siumut oqaluttarfimmi napparsimasut illersuisoqalernissaanik kissaateqarnertik saqqummiutissavaat.
Illersuisoqalernikkut napparsimasut napparsimanerminni atugaat paasiniarneqasinnaalissammata, peqalernissaa kissaatigaat.
Ajornartorsiutit qaammarsaavigineqassasut
Inuit Facebookimik atuinerat Siumup assersuutitut tikkuarpaa. Napparsimalersimasoqartillugumi ilaatigut innuttaasut aningaasanik katersuiniutsitsisarput. Napparsimasut illersuisuata napparsimasut atugaat qaammarsassavai pitsanngorsarlugillu.
- Napparsimasut aammalu Danmarkimut katsorsartikkiartorlutik angalasut atugaasa qanoq inneri inuit oqallittarfiitigut tusartuartarpagut. Allaallumi inuit oqallittarfiisigut katersuiniarnerit naalliunnermik paasititsiniaanerit maanna initoorujussuanngorsimallutik, Siumut siunnersuutiminni allappoq.
Siumut isumaqarpoq inuit atukkaminnik nittartakkakkut inuit attaveqatigiittarfiisigut tusaaneqarnissartik suaarutiginnittarnerat pissusissamisuunngitsoq.
- Tulluannngilluinnarporlu inuit attaveqatigiittarfiisigut erloqinermik paasititsiniaanerit imaaginnavissut ingerlanneqartuartarnissaat tusaaneqarnissamik ujartuineq aallaavigalugu. Taamaappammi aaqqitassaqarsimassaaq.
Napparsimasut illersuisoqalerpat ukiumut 1.813.000 kr missaani naleqassangatinneqarpoq. Tassunga ilanngullugu AC fuldmægtigip ukiup ataatsip iluani inatsisiliornermik sulinissaa ilanngunneqassalluni, 500.000 kr missaani naleqarluni.