Nanortallip kangiatungaani umimmaat 149-ut takuneqartut

Umimmaammita Kommune Kujallermi qassiuppat? Tamanna kommunimit akissutisineqarpoq.

Kommune Kujallermi Nanortaliup kangiatungaani umimmannik aatsaavissuaq kisitsisoqarpoq. Kommuni Nanortalimmi piniartut Pinngortitaleriffillu suleqatigalugit kisitsivoq.

- Qujanartumik ulloq taanna qatsungalluni seqinnarissorsuuvoq, kisitsisunut ungasianiit ajornannginnerusumik tumisiorsinnaalersillugit.

Umimmaat 149-ut

Kisitsinerrmi uumasoqatigiit qulit sinnillit naamattoorneqarput takku marluniit 37-nut amerlassuseqarput, marluk kisimiittut. Kisitsinermi inernerit siulliit takutipaat umimmaat 149-t naamattoorneqarsimasut.

- Ilisimatuup maluginiagaasa ilagaat umimmaat peqqippasittut, tassunga ilanngullugu oqaatigaa nassui allanut naleqqiullugit silinnerusutut pissuseqartut, taakkuuppullu ilaatigut misissoqqissaagassat, Kommune Kujalleq nittartakkamini allappoq.

Piffissami aggersumi misissueqqissaarnerit assilisat aallaavigalugit Pinngortitaleriffimmi ingerlanneqassapput.

Kingorna paasinarsissaaq angutivissat arnavissat piaqqallu qassiunersut qanorlu utoqqaassuseqarnersut. Umimmaat piaraaneraniit niaquisa nassuisalu isikkuisigut suiaassusaat takuneqarsinnaalereersarpoq, nassuisa ineriartornerasigut ersereertarput umimmaaqat qanoq pisoqaassuseqarnersut.

- Tamatuma saniatigut innersuussutigineqarpoq uumaffianni naasoqassuseq misissorneqassasoq, nunap naasoqassutsikkut nammassinnaa paasisinnaajumallugu, sapinngissamillu siunissami umimmaat amerlanerpaafigisinnaasaat paasilluarumallugu.

Misissueqqissaarneq naamassippat suliassaq tassaavoq, piniarnissamut inatsisitigut aalajangersakkat, ileqqoreqqusat, nalunaarsuinerit kiisalu nakkutilliinerit suliarinissaat, umimmanniarnermi aalajangersaanissaq siunertaralugu.