Nanortaliup avissaarnissaanut alloriarnerit
Nanortaliup Kommune Kujallermit avissaarusunnera kommunalbestyrelsimi oqaluuserineqassaaq. Avissaarnissaanut innuttaasut taasitinneqannginnerini avissaassappat qanoq kinguneqarsinnaaneranik nalunaarusiortoqarnissaanut aningaasanik 1 millionit koruuninik akiliisoqassanersoq ataatsimiinnermi oqaluuserineqassaaq.
Annonse
Nanortalimmi nunarfiinilu innuttaasut misigisimapput Kommune Kujallermiit sumiginnarneqarlutik, tamanna pissutigalugu avissaarusullutik atsiornernik februaarip qaammataani katersinikuupput.
Kommune Kujallip atsiornerit tiguai misissorlugillu. Misissuinermi paasinarsivoq atsiornerit ilaat inuup inuuianik nalunaarsorsimanngitsut. Atsiornerillu ilai nittartakkakku atsiorneqarsimammata nangaassuteqarsinnaallutik.
Inuit allattorsimaffii naapertorlugit atsiornerit ima isikkoqalerput:
• 780-it atsiorsimasut Nanortalimmeersuupput nunaqarfiineersuullutillu (69%).
• 344-it atsiorsimasut illoqarfinni allaneerusupput, soorlu Nuuk, Sisimiut, Danmarki allallu (31%)
• 18-it atsiorsimasut 18-it inorlugit ukioqarput.
Atsiornerit atorsinnanangitsut piiarneqareermata, atsiornerit katillutik 762-upput.
Taasititsisoqassappat ima pisoqassaaq...
Kommune maanna innuttaasunik taasisitsinissaq pillugu erseqqissumik paasisaqarnissamut qanilliallappoq. Kommunip siunnersuutigaa Nanortallip Kommunerisimasaani najugaqartut kisimik innuttaasunik taasititsisoqassasoq.
Avissaarneq pillugu innuttaasunik taasisitsinissaq sioqqullugu avissaarneq Nanortalimmi kommunimilu qanoq kinguneqarsinnaanersoq allaatigineqarluni nalunaarusiorfigineqassaaq.
Nalunaarusiaq 1 millionit koruunir angullugit akeqassaaq
Nalunaarusiaq avissaarnerup kingunerisinnaasaanik nassuiaasussaq 1 millionit koruunit missaanik akeqassangatinneqarpoq. Nalunaarusiaq misissueqqissaarnernik imalik avataaniit suliarineqassaaq, kommunillu nittartagaani Facebookianilu saqqummiunneqassalluni.
Kommunalbestyrelsip nalunaarusiornissamut immikkut aningaasaliissuteqarnissaa akuerineqassappat, suliaq piaarnerpaamik aallartinneqassasoq, Kommune Kujallermi kommunalbestyrelsimut siunnersuutigineqarpoq.
Kommunit aaqqissuussaanerat pillugu inatsisit naapertorlugit Naalakkersuisut Inatsisartunillu naggataatigut akuersissutigineqartarput.
Aasaaneranili atuanngiffeqannginneq sioqqullugu innuttaasunik taasititsinissaq ilimanaateqanngitsoq siunnersuummi allassimavoq.
