Naligiinnginnerup annikillisarnissaanut alloriarneq pingaarutilik

Isumaqatigiinniarnernit partiit illuatungiliuttut ataasiakkaarlutik qimagussorsimagaluartut, naggataatigullu naalakkersuisooqatigiit partiivi IA Siumumillu kiserngorussimagaluartut, Inuit Ataqatigiinni siulittaasoq akileraartarnermut aaqqissuusseqqinnissamut isumaqatigiissut nutaaq pillugu naammagisimaarinnippoq:

- Akissarsiakinnerpaat akunnattumillu isertitallit aningaasaqarnikkut periarfissarissaarnerulernissaat maanna qulakkeersinnaanngorparput, tamannalu anguniagaraarput. IA-mit nuannaarutigaarput sulisartut tassaammata iluaqutissanik malugisaqarnerpaasussat. Isumaqatigiissutip kinguneranik sartoq ataaseq qaammammut 1.000 koruuninik sinnerlugit aningaasatigut pitsanngorsaavigineqassaaq, IA-mi siulittaasoq naammagisimaarinnilluni oqarpoq, taannalu nangippoq:

 - Aammalu taamatut iliornitsigut, tassa akileraartarnerup aaqqissuuteqqinneqarneratigut inuiaqatigiinni naligiinnginnerup ukiorpassuarni annertusiartuinnarsimasup illuatungaanut saatinniarnissaa pingaaruteqartorujussuuvoq. Maanna pisuut piitsullu naligiinnginnerat annikillisartussanngorparput, tamannalu innuttaasunut neriorsuutigisimasatsinnut naapertuuppoq, tamannalu misigisaavoq nuannersoq.

Akileraarutinut akitsuutinullu aaqqissuussaanermut paasiuminartuuneq

Akileraarutinut akitsuutinullu aaqqissuussaanerput innuttaasut ikigisassaanngitsut paasiuminaatsittarpaat. Taamaattumik isumaqatigiissuteqartut aaqqissuussaanermik paasiuminarsaaniarput:

- Inuttut akileraarutit innuttaasunut ataasiakkaanut taakkulu aningaasaqarnerannut pingaaruteqarput, taamaattumik innuttaasunut ataasiakkaanut paasiuminaannerusariaqarpoq qanoq akileraartarnerup tungaatigut pisinnaatitaaffeqarnersugut pisussaaffeqarnersugullu, aarleqqutigineqarsinnaavorli innuttaasut akileraarutitigut pisinnaatitaaffimminnik annaasaqarsinnaasimasartut aaqqissuussaaneq paasiuminaatsillugu. Taamaammat tulliuttoq tassaavoq, akileraarutitta aaqqissuussaanerata paasiuminarsarnissaa aammalu pisariillisarneqarsinnaaffiatigut pisariillisarneqarnissaa. 

Akitsuutinut aaqqissuussaanermut aamma atuuppoq, ukiorpassuarni akitsuutitigut aaqqissuussaaneq pisariuneruleraluttuinnarsimasoq ilanngullugu pisariillisarniarneqarpoq, maannalu isumaqatigiissuteqartut aqqutissiuuttussanngorpaat akitsuusersuisarnikkut aaqqissuussaaneq pisariinnerulersinneqarlunilu paasiuminarnerulersinneqarnissaa.

Inuussutissarsiuteqartut aamma oqilisaaffigineqassapput - kingusinnerusukkut

Múte Bourup Egede erseqqissaavoq, ullumi Siumut peqatigalugu isumaqatigiissutigineqartoq aamma suliffeqarfinnut pitsanngorsaataasut ilaqartut:

- Soorunami tamatta kissaatiginartipparput suut tamarmik ataatsikkut aaqqinneqarsinnaassasut tamanullu ataatsikkut pitsanngorsaasinnaassalluta, kisianni tamatta nalunngilarput tamanna pisinnaanngitsoq, taamaattumik aaqqissuusseqqinnermi matumani siunnerfissatut tulleriaarinerillu aalajangersimasavut eqqarsaatigilluagaapput.

- Inatsisiliornikkut suliat peqqissaarussaasumik ingerlanneqartariaqarput, taamaattumik inuussutissarsiutinut tunngasutigut akileraartarnermut inatsisip iluani malittarisassat nalilersoqqissaarneqassapput, tamannalu pissaaq inuussutissarsiutinik ingerlatsisut nunami maaniittut toqqammavigissaartinneqarnissaat aammalu inerisaanissamut periarfissaat annertusarneqassallutik pisariillisaasoqassallunilu, Inuit Ataqatigiit siulittaasuat, Múte Bourup Egede, ullumi partiini sinnerlugu akileraartarnermut aaqqissuusseqqinnermut isumaqatigiissut atsioqataasoq naggataatigut erseqqissaavoq.