Siunnersuutigut Inatsisartut itigartitsissutigaat

Naleraq Inatsisartut upernaakkut ataatsimiinneranni oqaluuserisassamik sooq ataasiinnarmik ilanngussaqarsimanersoq Pele Brobergip nassuiarnialeramiuk pakatsisimanera arajutsisassaanngilaq.

- Ataatsimiinnermut siunnersuutinik nassiussisaqattaarpugut, piaaralutalu siunnersuutit ikittuinnaat nassiullugit. Nalunngilarput siunnersuutit “sakkortusut” inuiaqatigiinnilu oqallinnermik aallartitsissasut. Peqqinnartutut isigisarput, Pele Broberg Sermitsiamut oqarpoq.

Tunngavilersuutit assigiinngitsut

Siunnersuutit assigiinngitsunik tunngavilersuuteqarlutik itigartinneqartartut taanna oqarpoq.

- Tunngavilersuut siulleq tassaavoq kingusinaarluni tunniussineq. Naak siunnersuutivut kingulliit februaarip 17-iani nassiunneqaraluartut. Allaffimmi sulisutta paasigamikku unammillernartoqarsinnaasoq siunnersuutit tamaasa marsip aallaqqaataani nalunaaqutaq 14:51 nassiuteqqippaat. Sapaatip akunnerata tulliani allaffimmit qinnuigineqarpunga oqaluuserisassat ilanngunneqarnissaat pillugu qinnuteqaat tunniuteqqullugu kingusinaartumik tunniussisimaneq pissutigalugu. Taamaaliorpunga, Pele Broberg nassuiaavoq, suliarlu pillugu nangilluni: - Kingorna itigartinneqarpugut, tamatumalu kingorna nassuiaatit arlaleriarlutik allanngortinneqarlutik. Siullermik tunniussinissamut killigititaq. Taava Excelimi siunnersuutit tunniunneqartut allattorsimaffiat amigaatigineqartoq. Aamma fil-it tunniunneqartut allattorsimaffiata siunnersuutit tunniunneqartunut tulluanngitsut, assersuutigalugu kalaallisut allassimappata upa2024_77_titlen_Pele_KAL.pdf-imik taaguuteqartariaqarmata. Aamma siunnersuutit ataasiakkaat akuerineqarsinnaanngillat, ataatsimiinnermi najoqqutassianut Suleriaaseq pillugu Ataatsimiititaliaq kisimi allannguutissanik kisimi siunnersuuteqarsinnaammat.

Assiginngiiaarneri tunngavilersoqqugai

Tunngavilersuutit assigiinngiiaarnerannut patsisigineqartut allaganngorlugit piumagaluarpai "piffissaq eqqorlugu tunniussisimannginnerput" kisiat tunngavilersuutigineqarpoq.

Pele Brobergip ataatsimiinnerni oqaluuserisassatut siunnersuutinik ilanngussiniarnerup ajornakusoortarnera kisimi misigisimanagu oqarpoq.

- Kim Kielsen Inatsisartut siulittaasuattut ukiut marluk matuma siorna issianerani isumasioqatigiippugut. Tassani Kim Kielsen neriorsuivoq Inatsisartut suleriaasiannik allannguuteqarnissamut erngertumik siunnersuuteqarumaarlutik. Maanna ukiut marlussuit qaangiupput, suleriaasiannullu allannguutissatut siunnersuummik takusaqarsimanngilagut, partiip siulittaasua oqarpoq, taassumalu “siulittaasoqarfimmut isornartorsiuinissani takorloorsimanngilaa taamaalioqqusaanngimmat".

- Oqaluuserisassatut siunnersuuteqarnissaq qanoq ajornakusoortiginersoq assut eqqarsaatersuutigisimavara, Pele Broberg siunnersuutinik arlalinnik itigartinneqarsimasunik nassiussisimasoq oqarpoq. Siunnersuutit itigartinneqarsimasut ilaatigut makkuupput:

Siunnersuutit itigartitat

• Danmarkip naalakkersuisuinut Kalaallit Nunaata Folketingimi sinniisoqarfiata atorunnaarsinneqarnissaa siunertaralugu Naalakkersuisut saaffiginnissuteqarnissaannik peqquneqarnissaannik Inatsisartut aalajangiiffigisassaattut siunnersuut, pisariaqassappat tunngaviusumik inatsit allanngortillugu.

• Inatsisartut oqaluttarfianni oqaatsit kalaallisut atorneqartalernissaat anguniarlugu, Inatsisartut ataatsimiittarfianni malittarisassat ilusilersorneqarnerallu allanngortinneqarnissaat pillugu Inatsisartut aalajangiiffigisassatut siunnersuut.

• EU-mut aalisarneq pillugu isumaqatigiissut sivitsorneqassanngitsoq Naalakkersuisut EU-mut nalunaaruteqassasut, kiisalu OCTA-mut aninissamik nalunaaruteqarnissamik Inatsisartut aalajangiiffigisassaattut siunnersuut.

• Naalakkersuisut akileraartarnermut inatsisinik allannguinissaannut peqquneqarnissaannut Inatsisartunut aalajangiiffigisassatut siunnersuut, taamaalilluni akileraartarnermut aqutsisoqarfiup nammineq aningaasatigut naliliisarnera atorunnaartinneqarluni, innuttaasullu oqartussaasunut uppernarsaasariaqartarmata.

Inatsisartut siulittaasoqarfiannit akissuteqarnissaq Sermitsiap sulissutigaa.