Meeqqat inuusuttullu amerlanerusut Tusaanngap ikiorniarpai

Meeqqat inuusuttullu amerlanerusut Kalaallit Nunaanni oqarasuaatikkut siunnersuisarfimmut Tusaanngamut sianerunik tapersersorneqarnissartik naatsorsuutigisinnaavaat.

Kalaallit Nunaanni meeqqat inuusuttullu suli amerlanerusut siunnersorneqarsinnaanissaat anguniarlugu, Tusaanngap Danmarkimi peqatigiiffik Børns Vilkår suleqatigilerpaa.

Apeqqutit ajornartorsiutilluunniit minnerunatillu annerunngillat

Meeqqat inuusuttullu ilungersunartunik ajornartorsiutillit ikiorneqarnissamik tapersersorneqarnissamillu ujartuisut Tusaanngap oqaloqatigisarpai. Kalaallit Nunaanni meeqqanut inuusuttunullu tamanut siunnersuisartuunini Danmarkimi soqutigisaqaqatigiiffik Børns Vilkår suleqatigalugu Tusaanngap siammarterniarpaa. Tusaanngamut apeqqutit, eqqarsaatit ajornartorsiutilluunniit annertuallaaratillu annikippallaanngitsut, Tusaanngamit oqaatigineqarpoq.

- Meeqqanut inuusuttunullu sullissinerup pitsaanerulersinnissaa Tusaanngap sivitsortumik kissaatigisarsimavaa. Tamannalu Børns Vilkår suleqatigilerneratigut piviusunngoraluttuarpoq. Tusaanngap digitaliusumik siunnersuiffimmik quppersagaqalernissaa suliniutaavoq annertulerumaarnissaanik neriuuteqarfigisarput, kinaassutsimik isertuussinermik annertusaasoq, ikiuinermillu tikikkuminarsaasoq, meeqqat inuusuttullu sumiiffigisartagaanni: internetikkut. Neqeroorut tamanna ajornanngitsoq Kalaallit Nunaanni asseqanngilaq, Tina Evaldsen Isumaginninnermut Aqutsisoqarfimmeersoq, oqarpoq.

Ukiuni 40-ni misilittakkat isumassarsiorfiusut

Ukiuni 40-nngulersuni Danmarkimi Børns Vilkårip meeqqat oqarasuaataat “BørneTelefonen” ingerlatarisimavaa, tassani meeqqat inuusuttullu persuttaaneq, atornerluineq, sumiginnagaaneq, asannilerneq, ikinngutigiinnerlu pillugit oqaloqatigineqartarsimallutik.  

Ukiorpassuarni misilittagaqarfigineqareersup ataatsimut siunnerfeqarluni inerisarneqarnissaa siammarterneqarnissaalu anguniassallugit suleqatigiinnerup nutaajusup qiteraa, soorluttaaq Tusaanngap neqeroorutai pioreersut siammasinnerusumik ajornartorsiutinut assingusunut meeqqanut inuusuttunullu tikikkuminarsarnissaat anguniaraa.

- Inuunerup ajornarluinnarfiani meeqqat inuusuttullu ajornartorsiutaannik oqilisaassinikkut suliatsinnik paasisimasatsinnillu tapersiisinnaagatta Børns Vilkårimit nuannaarutigaarput. Qallunaallu aningaasaateqarfiinut suliniutitsinnut tapersersuisunut qujarusuppugut, Børns Vilkårimi pisortamut tullersorti, Steffen Raun Fjordside, oqarpoq.

Kalaallisut ikioqatigiitta

Tusaannga Kalaallit Nunaanni kisiartaalluni oqarasuaatikkut meeqqanut inuusuttunullu siunnersuiffittut neqeroorutaavoq. Periarfissat neqeroorutaasut siammasinnerusumik internetsip nittartagaatigut  Børns Vilkårip suleqatigineratigut tikikkuminartuutikkusuppai. Oqarasuaatikkut internetsikkullu kiffartuussineq sapaatip akunnerisa ullui tamaasa ulloq unnuarlu atuuttuuvoq.

Tamatuminngalu aamma allakkatigut apeqquteqartarfik “Ikioqatigiitta” pilersinneqassaaq, meeqqat meeraqatiminnut siunnersuisinnaanerat ammaanneqassammat.

- Kalaallit Nunaanni meeqqat inuusuttullu ajornartorsiortut ajornanngitsumik aperalutik ikioqqullutillu saaffiginninnissaminnut neqeroorfigineqarneq ajorput. Taamaattumik Tusaannga pitsannguiffigerusupparput, neqeroorullu Kalaallit piorsarsimassusaannut, kinaassusaannut oqaasiinullu tulluartuuvoq. Meeqqat inuusuttullu naapinneqarlutik tikilluaqquneqarlutillu saaffigisinnaasaat pilersinneqarpoq, Tina Evaldsen oqarpoq.

Tusaanngap annertunerulersinnerata saniatigut Kalaallit Nunaanni meeqqat inuusuttullu tarnimikkut atugarliuuteqarnerisa minnerulersinnissaat assigiinngitsutigut ingerlatsinikkut annikillisarneqassaaq, taakkulu piffissap ingerlanerani pisariaqartitsineq tunngavigalugu Børns Vilkår suleqatigalugu ineriartortinneqassapput.