ANGUT 23-NIK UKIULIK EQQARTUUNNEQARTOQ
Marloriarluni atornerluisimanerminut ukiuni sisamani qaammatinilu arfinilinni pineqaatissinneqartoq
Angut 23-nik ukiulik ukiuni sisamani qaammatinilu arfinilinni pinerluuteqarsimasunut inissiisarfimmiittussanngortinneqarpoq. Sermersuup eqqartuussivianit piffissaligaanngitsumik inissiisarfimmiitinneqartussatut eqqartuunneqarsimagaluartoq, nunatta eqqartuussivianit piffiassalerlugu inissiisarfimmiittussanngortinneqarpoq.
Annonse
Nunatta Eqqartuussiviata angut 23-nik ukiulik marlunngornermi 26. marts eqqartuuppaa. Angullu niviarsiaqqamik aqqanilinnik ukiulimmik aamma angummik 61-inik ukiulimmik kinguaassiutitigut atornerluisimasutut, ukiuni sisamani aamma qaammatini arfinilinni pinerluuteqarsimasunut inissiisarfimmiittussanngortinneqarpoq.
Angut Sermersuup Eqqartuussivianit decemberimi 2023-mi piffissaligaanngitsumik tigummineqartussatut pineqaatissinneqarsimagaluarpoq. Suliarli nunatta eqqartuussiviani suliassanngortinneqarpoq, nunattalu eqqartuussiviata ullumi aalajangerpaa angut piffissami aalajangersimasumi pineqaatissinneqarsimasunut inissiisarfimmiitinneqassasoq.
- Angut siornatigut kinguaassiutitigut atornerlueriarsimasutut pineqaatissinneqareersimavoq. Maannalu eqqartuussivimmi aamma nunatta eqqartuussiviani kinguaassiutitigut marloriarluni atornerluisimasutut eqqartuunneqarpoq. Isumaga malillugu angut pineqartoq inuiaqatigiinni innuttaasunut ulorianartuuvoq, unnerluussisussaatitaasoq Gutti Harryson oqarpoq nangillunilu:
- Ukiuni sisamani aamma qaammatini arfinilinni pineqaatissinneqarmat takusinnaavarput eqqartuussiviup pinerluuteqarnerit sakkortuutut isigigai, Gutti Harryson oqarpoq.
Ulloq unnuarlu angerlarsimaffimmut isertersimasoq
Angut 10. maj 2022, 21-nik ukioqarluni Nuummi meeqqanut ulloq unnuarlu angerlarsimaffimmut pinerlulluni isersimavoq. Unnummi tassani niviarsiaraq aqqanilinnik ukiulik kinguaassiutitigut atornerlussimavaa. Niviarsiaqqap ikioqqulluni nillianerani sulisut itersimapput, angullu tiguneqarsinnaasimalluni, politiillu aggernissaasa tungaanut tigummineqarsinnaasimalluni.
Angut pisumut tunngatillugu tigummigallagassanngortinneqarsimavoq.
Unnerluussut naapertorlugu angut maanna 23-nik ukiulik tigummigallarneqarnermi nalaani angummik 61-inik ukiulimmik aamma kinguaassiutitigut atornerluisimavoq. Pisut taakku saniatigut angut nakuusersimasutut, ujajaasimasutut pinngitsaaliillunilu tigumminnissimasutut aamma unnerluunneqarsimavoq.
- Suliamut tunngatillugu angut maanna 23-nik ukiulik tarnikkut misissorneqarsimavoq, Eqqartuussinermilu nakorsat siunnersuisoqatigiit oqaaseqaatiliorsimapput. Oqaaseqaat tarnikkullu misissuinerup inernera tunngavigalugit unneruussisussaatitaasup piumasarigaluarpaa angut piffissaligaanngitsumi tigummineqartariaqartoq.
