KL

DK

Aaqqissuisoq innersuussivoq:

Makka inissamik pissarserusuinnarpoq

Aportinnerup kingornalu avinnerup Makka Lynge Kleist ukiut tallimat matuma siorna angerlarsimaffeqanngitsunngortippaa. Initaarumalluni sorsuuteqarnermini ikiorneqarsinnaanngitsutut misigivoq

Avataanit sunniutit nammineq siunniuteqarfigisinnaanngisani pissutigalugit Makka Lynge Kleist angerlarsimaffeeruppoq.
Jette Andersen
Journalist Redaktør

- Nukarlequtiga 13-ileeqqammivoq, najugaqartiginissaralu sakkortuumik kissaatigaa. Sulissannginnera nammineerlunga qinigarinngilara. Sooq ikiorneqarsinnaanngilanga? 

Makka Lynge Kleist killitsisimaqisoq taama aperaaq. 

Inuunera ueqarluni, meeraqarluni, ilinniagaqarluni suliffeqarlunilu ajutoornissap tungaanut ingerlalluarpoq. 2008-mi naartulluni Nuummi biilinik aportippoq, timimigullu qatigammigullu katsorsarneqarsinnaanngitsumik ajoquserpoq, ullumikkullu ulloq tikillugu anniaateqarpoq. 

Aaqqissuisuuneq innersuussivoq:

Allaaserisaq una aviisimit AG-mit tigusaavoq, AG-milu aaqqissuisumit Jette Andersenimit toqqarneqarluni.

Taamaalillutit nittartakkami atuartartutut aviisimi allaaserisamik, nalinginnaasumik aningaasanik akeqartartumik atuarsinnaallutit. Neriuppugut allaaserisaq aviisit allaanerunerannik aamma tusagassiutini akeqanngitsuni issuakkatut nutaarsiassaannaannginnerannik takutitsiumaartoq. Aviisit pitsaassusaat annertooq itisiliinernit aamma tunuliaqutinik aamma minnerunngitsumik inuit pillugit allaaserilluakkanik pissuteqarput.

Neriuppugut misiliummik pisartagaqalernissannut isumassarsiorfigisinnaagit, taamaalillutik inuiaqatigiit ineriartornerannut malinnaalluarsinnaanerussagavit.

Aviisimut neqeroorummik pissarsigit – 38 39 40 sianerfigiuk imaluunniit mail adm@sermitsiaq.gl allaffigalugu

Makka Lynge Kleist, 45-nik ukiulik, taamanikkut allaffimmiunngorniarluni ingerlalluarpoq, Nuummilu pisiniarfimmi suliffeqarluni. Tamakkuli tamaasa taamaatiinnartariaqarsimavai, ajutoornermillu ukiut marluk qaangiunneranni – sulinermillu arlalinnik misilittaavigineqareerluni – kommunip peqqinnissaqarfiullu akornanni siusinaartumik soraarnerussutisiaqalissasoq aalajanger- neqarpoq. 

- Tamanna uannut suli akueriuminaatsorujussuuvoq, anaanaq tallimanik meeralik, Makka Lynge Kleist qullilluni oqarpoq. 

- Imminut napatittuarsimavunga, taanna oqarpoq. 

- Maanna ikiorneqartariaqalerninni ikiuisussaqanngilaq, taanna oqarpoq.

 2019-mi ilaqutariinnerat isasoorpoq, uigisaminullu nukarlequtimilu ataataanut attaveqarluarnini attatiinnarpaa. Makka Lynge Kleistilli angerlarsimaffeerunnera tamatuma aamma kinguneraa. Siullermik uigisimasani illoqatigalugu misiliigaluarpoq, sakkortuallaarmalli aniinnartariaqarpoq. 

Meeqqanik nukangasunik marlunnik anaanaminni najugaqassallutik pisariaqartitsillutillu kissaateqartunik meeraqarami Kommuneqarfik Sermersuumi isumaginninnikkut inissiamik ikiorserneqarnissaminut ukiuni tallimani misiliisaraluarpoq, iluatsinngitsumilli. 

Oqartussanut assigiinngitsunut attaveqartaraluarpoq, mannali tikillugu suli angerlarsimaffeqanngitsutut inuuvoq. Ukiuni tallimani ineeqqamit ineeqqamut inissiamillu inissiamut nooqattaarpoq.

Misigissutsit sakkortuut 

2020-mi Kommuneqarfik Sermersuumi sulianik isumaginnittuata arlaannik nuuffigisinnaasaminik ilisarisimasaqarnersoq aperaa. Sisimiuniipput angajoqqaavi, taakkulu taavai. 

Makka Lynge Kleistilu naapertorlugu nammineq sulianillu isumaginnittuata Nuummi meeqqat najugaqarfianni inissiamik pissarissinnaalernissaata tungaanut Sisimiunukarnissaa isumaqatigiissutigaat. 

Atorsinnaanngitsutut misigisimavunga, meeqqakkali pillugit sorsuuteqarnera nangippara

Makka Lynge Kleist

Naak ikiorneqaraluarluni, Rigsombudimillu marlunnik mikisunik meeralittut siusinaartumik soraarnerussutiaqartuunini pissutigalugu salliutinneqartussaagaluarluni, kommuni inissaqartitsinngilaq.

 Ukiut tallimat ingerlaneranni inissiamik siusinaartumik soraarnerussutisiaqarnermigut akilersinnaasaminik Kommuneqarfik Sermersuumut sorsuuteqartariaqarninni paasisinnaanngilaa. 

- Suunngitsutut misigisimavunga. Aqqut suna aqqutigissanerlugu naluara. Ikiorneqarumanngilanga. Suliffeqanngikkaanni kommuni tassaagaluarpoq ikiorsiisartoq. Kommunimit sumiginnagaasutut misigisimavunga. Inoorusussuseeruteqqavunga. Atorsinnaanngitsutut misigisimavunga, meeqqakkali pillugit sorsunnera ingerlattuassavara. 

- Ernumaneq qasusoornerlu nappaatigaakka, aarleqquteqarneralu pissutigalugit unnuppassuit sinissinnaasanngilanga, taanna oqarpoq. 

Makka Lynge Kleist 2020-mi nuukkami meeqqani ataataannut qimappai. Taamaaliornerminilu aarleqquteqanngilaq, ataataalluartuuvormi, nukarliilli marluk suli mikipput anaanasserillutillu, tassanngaannarli Sisimiunut nuummat anaanartik najorunnaartariaqarpaat. Tamatumalu saniatigut inerisimasunngoreerluni angajoqqaanut utimut nuunneq pitsaanerpaajunngilaq.

- Siusinaartumik soraarnerussutisiakka, taamanikkut qaammammut 7.000 koruuniuusut atorlugit Sisimiut Nuullu akornanni utikappunga, taanna oqaluttuarpoq.

Sermersuumi isumaginninnikkut inissiat:

Piumasaqaatit: 

• Illoqarfiup immikkoortuani sumiiffigisanni pisinikkut attartornikkulluunniit imaluunniit pisortat inissiaatileqatigiiffianni nuunnissamik kissaateqarnikkut naapertuuttumik inissiamik pissarsisinnaanerit uppernarsassavat. 

• Inissarsiorlutik nalunaarnissamik kaammattorneqarputit, assersuutigalugu piffimmi tusagassiorfitsigut, tusagassiorfitsigut allatigut tamalluunniit takusinnaasaanni. 

• Inissarsiortuussaatit Kommuneqarfik Sermersuumilu inissiaatileqatigiiffinni pisortanit pigineqartuni utaqqisutut allatsissimasuussallutik. Isumaginninnikkut inissiamut utaqqisutut allatsissinnaanerpit isummerfigineqarnerani atukkatigut inissisimanerit tunngavissaatinneqassaaq.

Pingaarnersiorneqartut arfineq marluk Kommuneqarfik Sermersuup nittartakkakkut quppernerani takuneqarsinnaapput. Issuaavik: sermersooq.gl

Billetip saniatigut soorunami aamma Nuummiinnermini oqqiffissani akilertariaqartarpaa. Taakkulu qaammammusiai nungussinnaasarpaat. Meeqqanili takorusuppai, taamaammallu sumiiffissarsiornermini Facebook atorlugu qinaasivoq. 

Sisimiuni piffissamili sivikitsumi inissiamik attartugassarsivoq, kukkunerli pissutigalugu taamaatiinnartariaqarpaa, taannami siusinaartumik soraarnerussutisiaanit akisunipilussuuvoq. 

2021-mili Nuummut uteqattaartuarneq akisummat aalajangertariaqarpoq. Sulili kommuni inissiamik neqeroorutissaqanngilaq.

Nikallunganeq

Nammineq imminut napatittuunermit ikiorneqartariaqartunngornermut allanngornerujussuup Makka Lynge Klesti imigassamik qasukkarsaateqalersippaa. Ukiuni tallimani imigassartorsimanngilaq, angajulliillu pingasut angerlarsimaffimmi eqqissisimakannersumi peroriartorput, nukarliilli ilatigut Makkap imerajuttuulluni angerlarsimaffeqanngitsuusoq peroriartorput. Taannalu nukarliup tullianut sunniuteqarnerluppoq, Makka oqarpoq qissaserlunilu. 

- Taanna maanna inersimasunngorpoq, kingusinaareerporlu, neriuppungalu nukarlermut pitsaasumik iliuuseqarsinnaanissara angumerissallugu, taanna oqarpoq. 

- Maanna qaammatini 14-ni imigassartorsimanngilanga, taanna oqarpoq, nukarlerlu inimi ikinngutiminit attartukkamineeqatigisarlugu nangilluni oqaatigaa. 

- Nukarlequtiga ullut tamaasa qiasarpoq uanneerusullunilu, taamaammat ataataalu uanniissinnaasoq isumaqatigiippugut, naak suli inissaqanngikkaluartunga, taanna oqarpoq. 

- Kommunimut saaffiginnittuaraluarpunga, Sisimiunilu najugaqartutut nalunaarsoqqanera ajornartorsiortitsivoq. Tamanna paasisinnaanngilara. 2019-illumi kingorna ikiorserneqarumallunga saaffiginnittarsimagaluarnera takusinnaavaat, taanna nikallungalluni oqarpoq. 

Atornerluinermik katsorsaasunilu kommunimiissimagaluarput, taassumalu innersuussimagaluarpaa, tamannali kommunimit inissiamik tunineqarneranik aamma kinguneqanngilaq. 

Kommuneqarfik Sermersuup aviisip naammassinissaanut akissuteqarnissani angumerinngilaa, suliarli misissorlugu, kommuni AG-mut paasissutissiivoq.

inuiaqatigiit samfund
Powered by Labrador CMS