Maanaannaq qinersineq aaqqiissutissaanngilaq

Amerlasuut ilimagisimassagunaraluarpaat nunatsinni politikkikkut eqqissilluni sulisoqarsinnaalersoq, parteersuit marluk imminnut unammiuaannarnikuusut 4. april 2022-mi amerlanerussuteqarluinnartunik tunuliaqutaqarlutik suleqatigiilermata (21/10 kingusinnerusukkullu 20/11).

Kisianni naatsorsuutigisamit allaanerususumik pisoqarpoq. Tassami Siumup tunuliaqutai eqqissiumanngitsutut pissusilersorput. Naalakkersuisooqatigiit aallartimmatali parteerujussuarmi tassani ajornartorsiutitut nalilikkat annikitsut annertuullu puttussuuttualerput, tamarmillu nipituumik oqallisigineqartarlutik, Kalaallit Nunatsinni avatitsinnilu malinnaaffigineqarsinnaallutik.

Sumiiffinni immikkoortortaqarfiit ilai namminneq siunertaqarlutik ingerlatsipput, Siumumi politikerit ataqqineqarluartut ilai partii qimassallugu aalajangersimapput, allallu parteertik partiimut annerpaanngornikuusumut Inuit Ataqatigiinnut anngaaginnartussianngorsimanerarpaat.

Siumup nunatsinni borgmesteriutitatuariligaa, Qeqqata Kommuniani borgmesteri, Malik Berthelsen maanna oqallinnermut akuliuppoq.

Avataanit pissutsit nunatsinnut sunniuteqarput

Borgmesteri Malik Berthelsenip paasisinnaannginnerarpaa qanoq ililluni inuit ilaasa Naalakkersuisut maannakkut atuuttut pisuutissinnaagaat 'ilutsit avammut tunngasut' aallaavigalugit:

- Uanga isumaqarpunga maanaannaq qinersineq atugarissaarnerulernermik kinguneqarnavianngitsoq. Assersuutigalugu nunarsuarmi niuerfinni pissutsit akit qanoq inissisimanissaannik aalajangiisuupput. Taamaattumik partiit ataasiakkaat akisussaatinniarneqarsinnaanngillat inuuniarnikkut atugassarititaasut akit qaffasissusaanik aallaavillit pillugit, tassami tamanna nunarsuarmi ajornartorsiut piuvoq, tamannalu maani nunatsinni tamaviaarluni aaqqiiviginiarneqartuarpoq.

Berthelsenip erseqqissaatigaa, Naalakkersuisut ulluinnarni nioqqutissat akisunerulernissaannik  suliniuteqarsimaneranik takusimanani, imigassat aalakoornartut imeruersaatillu sodavandit eqqaassanngikkaanni . Taassumattaaq erseqqissaatigaa, nuna tamakkerlugu ikummatissat akii aalaakkaasut qulakkeerneqarsimasut taamatuttaaq ikummatissanik mingutsitsissutaasunik atuinnginnerulernissamut suliniuteqartoqarsimasoq.

Siumut Inuit Ataqatigiinnut anngaasussiaannaanngilaq

Siumut Inuit Ataqatigiinnut anngaasussiaannanngorsimaneragaasarnera ilisarisinnaannginnerarpaa:

- Siumup Inuit Ataqatigiinnut anngaasussiaannanngorsimaneragaaneranut takussutissat suuppat? Uanga paasisara malillugu, Naalakkersuisut suleqatigiinnerat ataqqeqatigiinnermik aamma tatigeqatigiinnermik aallaaveqarpoq, taakkulu suleqatigiillutik anguniakkat nunatsinnut iluaqutaasussat piviusunngortinniarlugit suliaqarput. Uanga paasinninnera tassaavoq, suleqatigiinneq ataqqeqatigiinnermik aamma tatigeqatigiinnermik tunngaveqartuusoq.

- Taamaattumik kaammattuutigissavara, akerleriissutissarsiorneq pinnagu, maanaannaq qinersinissamik piumasaqaateqarnermut nukinnik atuinata, meeqqat pitsaanerusumik isumannaatsumillu avatangiiseqalernissaat qulakkeerniarlugu piffissamik atuinerput atorluarnerussagipput, tamannalu suliassaq pingaaruteqarluinnartoq ataatsimoorluta sulissutigisariaqarparput. Isumaqarpunga nunatsinnut tamanna pitsaanerpaajussasoq minnerunngitsumillu meeqqanut.

Borgmester Malik Berthelsen naggasiivoq pissutsit piviusut killiffimmillu takutitsisut aallaaviginerusariaqartut. Ilinniartitaanermut atatillugu kinguaariit kingulliit angusaat aammalu nunami innuttaasut akornanni ilinniartitaanerup qaffassarnissaanut anguniagaqarnermi angusaqarfiunngitsumik inerniliussat eqqaasitsissutigalugit:

- Assersuutit taakku marluinnaagaluartut ersersippaat inuiaqatigiit siuarsarneqarnissaannut nukivut atortariaqarigut maanaannaq qinersinissamik piumasaqarnermut nukiit atorunnaarlugit, taanna oqarpoq.