Nutartigaq
Kilisaat ajunaalernermik kalerrisaarereerluni kivivoq
Kilisaammi inuttat unnuaq Sisimiuliaanneqarlutik qimagussuunneqarput.
Royal Greenlandimit paasissutissat atorlugit nutartigaq
Kilisaat Lumor Sisimiut kujatinnguani unnuaq ajornartorsiulerpoq.
Inuttat kilisaammit qimagussuunneqarput Sisimiunullu unnuaq tulaanneqarlutik.
Tusarfiit arlallit pisoq pillugu Sermitsiamut ilisimatitsipput.
Issittumi Sakkutooqarfiup umiarsuaa alapernaarsuut Hvidbjørnen aamma Kalaallit Nunaanni Politiit qimagussuussinermi ikiuutaapput.
Inuttat quliusut tamarmik ajoqusersimanngitsut Royal Greenlandip attaveqaqatigiinnermut pisortaata Merete Lindstrømip Sermitsiamut uppernarsarpaa.
Nal. 03.51 kivisoq
- Pisoq quarsaarutigaarput inuttalli ajoqusersimannginnerat oqiliallaatigalugu. Pisumit soorunami tupaqqapput, ikiuigasuartartunit sukkanerpaamik ikiorneqarnissaat maanna sulissutigaarput, Merete Lindstrøm oqarpoq.
Inuttat Aasiaat Radioanut nal. 23:50 ajunaalernermik nalunaaruteqarsimasut ilanngullugu paasissutissiissutigaa. Politiit angallataat Ilik siulliulluni Lomurimut apuuppoq inuttallu angallummut ikaartillugit. Lomur nal. 03:51 kivivoq.
- Politiit, umiatsiaq nammineq pigisaq qanittumiittoq aamma Issittumi Sakkutooqarfik sukkasuumik iliuuseqarnerlutillu ikiuunnerinut qutsavigaagut, Merete Lindstrøm oqarpoq.
Oqartussat pisumut paasiniaasussat Royal Greenlandip attaveqarfigereerpai.
