Kilisaammi inuttat Issittumi sakkutooqarfiup nersualaarpai
Kilisaammi Lomurimi inuttat umiarsuartik ajornartorsiulermat iliuuseqapallassimasut Issittumi Sakkutooqarfik paasissutissiivoq.
Annonse
Aasiaat Radioa arfininngormat nal. 23.50 kilisaammit Lomurimit, Sisimiut kujataatungaaniittumit, kallerisaarneqarpoq. Inuttat ajunaalernermi nalunaaruteqarput kilisaallu kivilernerarlugu.
Aasiaat Radioata Issittumi Sakkutooqarfik kalerrippaa, taannalu Kalaallit Nunaanni Politiit suleqatigalugit Issittumi Sakkutooqarfiup umiarsuaa alapernaarsuut Hvidbjørnen politiillu angallataat sukkasuuliaq Ilik Lomurip inissisimaffianut aallartippaat.
Taama Issittumi Sakkutooqarfimmi tusagassiortunik kiffartuussisoq Camilla Schouw Broholm Sermitsiamut oqarpoq.
Umiatsianut annaassiniutinut
Nalunaaqutaq 00.55, ajunaalernermik kalerrisaarisoqarnerata kingorna nalunaaquttap akunnera ataaseq qaangiuttoq, Issittumi Sakkutooqarfik nalunaarfigineqarpoq inuttat umiatsianut annaassiniuutinut ikisut, sivitsunngitsorlu nalunaarutigineqarpoq inuttat qulit tamarmik ajoratik umiatsianut annaassiniutinut ikisimasut.
- Lomurip inuttai iliuuseqapallallutik umiatsianut annaassiniuttunut sukkasuumik ikipput, Camilla Schouw Broholm oqarpoq.
Inuttat Lomurimit qimagutereermata minutsit arlaqanngitsut qaangiuttut politiit angallataat Ilik tikiuppoq, inuttallu qulit ikitinneqarput.
Mingutsitsisoqarnersoq nakkutigineqartoq
Ilik inuttat qulit umiatsiallu annaassiniutit ilagalugit Sisimiut umiarsualiviannut nal. 02.30 tulapput.
Lomur ullaassakkut nal. sisamat missaanni kivivoq.
- Hvidbjørnen sumiiffimmiiginnarpoq imaq mingutsinneqarnersoq nakkutigalugu misissorlugulu, Camilla Schouw Broholm oqarpoq.
Issittumi Sakkutooqarfiup maanna suliaq Søfartsstyrelsenimut, pisumut misissuisussanut, ingerlateqqissavaa.
