Ministeri
Kangerlussuup mittarfianut aningaasaliisoqassaaq – timmisartulli anginerusut minnissaanuunngitsoq
Kangerlussuup siunissami atorneqarnerata tapersersornissaa Troels Lund Poulsenip (V) qilanaaraa. - Angusaqarluareerpugut, illersornissamut ministeri misissuinerup kinguaattoorneranut atatillugu oqarpoq.
Naalakkersuisut Illersornissamut ministereqarfimmillu misissuinerat qaammatip matuma naannginnerani naammassineqartussatut naatsorsuutigineqaraluartoq kinguaattooqqavoq, misissuinerli ingerlalluarpoq. Ilulissani Nuummilu mittarfiit nutaat sananeqareerpata Illersornissaqarfiup Kangerlussuarmi mittarfimmik atuiuarnissaanik misissuineruvoq. Tamatumani aamma Kalaallit Nunaata timmisartuussinermik pisariaqartitai aamma suleqatigiinnissamut periarfissat ilanngunneqarput, illersornissamut ministeri Troels Lund Poul (V) Nuummut tikeraarnermini oqarpoq.
- Angusaqarluareerpugut, tassa uagut kisitta misissueqqissaarnerit ingerlattussaannginnerinik paasillugu, Kalaallit Nunaata tungaanit aamma misissuisoqartussaavoq. Apeqqummi tamanna pillugu Erik Jensen oqaloqatiginikuuarput, Troels Lund Poulsen oqarpoq, Illersornissaqarfillu inuiaqatigiinni Naalagaaffeqatigiiffik tamakkerlugu pingaarutilinnik suliaqartartoq nassuiarlugu.
- Taamaattumik aamma nuannaarutigaara Namminersorlutik Oqartussat peqatigalugit siorna apriilimi sinaakkutissatut isumaqatigiissuteqarnerput, Illersornissaqarfiup Kangerlussuarmi mittarfimmik atuiuarnissaanut periusissamik sulissutiginninnissamut. Illersornissamut ministeriaqarfiup tamanna tunngavigalugu Illersornissaqarfiup siunissami Kangerlussuarmi pisariaqartitai pillugit misissuineq aallartippaa.
- Tamanna Illersornissamut isumaqatigiissutip siorna juunimeersup Atlantikullu Avannaani aamma Issittumut ilaliussatut isumaqatigiissutaasussap atulersinneqarnerata peqatigisaanik pivoq. Tamanna tunuliaqutigalugu Kangerlussuarmi sakkutooqarnikkut pisariaqartinneqartut pillugit misissueqqissaarneq ukioq manna kingusinnerusukkut naatsorsuutigineqarpoq, illersornissamut ministeri oqarpoq.
Mittarfiup piginnaasaanut aningaasaliineq
Illersornissaq pillugu isumaqatigiissummut ilaatillugu naalagaaffeqatigiinnermut aningaasaliissutinut pilersaarusiussaaq, tassanilu aamma Kangerlussuup siunissaa aaqqiissutissarsiorfigineqassaaq.
- Isumaqarpunga aamma neriuppunga aasaanerani sulinngiffeqarnerup kingorna naalagaaffeqatigiinnermut aningaasaliissutinut pilersaarusiorutta, Kangerlussuup siunissaa qanoq ikkumaarnersoq paasissallugu, Troels Lund Poulsen oqarpoq.
Taassuma oqarnera naapertorlugu illersornissaqarfiup Kangerlussuup mittarfianut aningaasaliinissamut piumassuseqarnera erserpoq.
- Kangerlussuup siunissami atorneqarnissaa danskit tungaannit tapersersorneqarnissaa takorusuppara, taamaalillutalu aamma mittarfiup annertussusaata attanneqarnissaanut aningaasaliiumasoqarnissaa, timmisartut anginerit mittarnissaat pinnagit, kisianni atorneqarsinnaaneranut tunngatillugu, illersornissamut ministeri naqissusiivoq.
Isumaqatigiissutaagallartut
Ukiup naannginnerani misissuinerit naammassineqarsinnaanngippata, illersornissaqarfiup Kangerlussuup mittarfianik atuinissaa pillugu isumaqatigiissutaagallartunik suliaqartoqassaaq.
- Tamanna ajornarpat, illersornissaqarfiup Kangerlussuarmi mittarfimmik atuinissaanut isumaqatigiissutaagallartunik isumaqatigiissusiortoqassaaq, timmisartorsuarmik timmisartuussinerit nuunneqarneranniit atuuttussamik. Sakkutuut siunissami pisariaqartitaannik misissuineq illersornissaq pillugu isumaqatigiissusiornermut aamma Atlantikup Avannaanut Issittumullu isumaqatigiissusiornermut attuumassuteqarpoq.
- Taamaattumik siunissami Kangerlussuarmi mittarfik sakkutuut pisariaqartitaannut aalajangiiffigineqannginnerani piffissaq sivisooq ingerlaqqaassaaq. Illersornissaqarfiup Kangerlussuup mittarfianik atuineranut isumaqatigiissutaagallartussamik suliaqartoqarpoq, taanna ukiumit nutaamit, aammalu siunissami tamakkiisumik pisariaqartinneqartut qulaajarneqareernerisa tungaanut atuutissaaq, Troels Lund Poulsen (V) nassuiaavoq.