Kamaap tiguarpaanga

Narsami umiarsualivimmi qinngasaarneqarneq pissutigalugu unnerluunneqartoq kamarujussuarpoq, tamatumalu kingunerisaanik pissutsini 28-ni unnerluutigineqarpoq, taakkunanngalu 14-it inunnik toqutseriaraluarnerupput.

Suliaq piffissanut pingasunut avinneqarsinnaavoq: aallaasersortoqarnera sioqqullugu, aallaasersortoqarneranut kingornalu Nuummi pineqaatissinneqarsimasunut inissiisarfimmi ilaatigut ikuallatsitsisimanerminik nassuerneranut.

Aallaasersortoqarnera sioqqullugu aallaasersornerullu nalaani tigusaannginnerminilu pisut pillugit unnerluutigineqartoq sooq kamalersimanerluni, aammalu aallaammik imassaanillu pissarsiniarsimanerluni nassuiaateqarpoq.

Kamaammerpoq

Narsami umiarsualivimmi kamanneq aallartippoq.

- Qinngasaaripput. Najuuttut tamarmik nikaginnillutik aallartipput. Tamanna qatsutiummerpara tilloriarpakkalu, Martin Strandby Nielsenimit, immikkut unnerluussisussaatitaasumit, unnerluutigineqartoq killisiorneqarnermini oqaluttuarpoq.

Taava qanoq pisoqarpa?

- Tamanna oqaaseqarfigerusunngilara.

Angut tilluppiuk?

- Aap, niaquagut.

Sumik tilloriarakku?

- Assannik

Niaquata sortaagut?

- Tunuaniiugunarpoq, eqqaamajuminaatsipparali.

Tillussinerup saniatigut aamma allamik iliuuseqarpit?

- Toqqusassippara

Oqaaseqarfigivigit?

- Aap, aniliitigalunga. Aallaammik aallereeruma takussaagut.

Sooq taama oqarpit?

- Kamaammerujussuarama

Kingorna qanoq iliorpit?

- Angerlarpunga

Taava qanoq iliorpit?

- Uagutsinni eqqissisimaarpunga, kamanniarnanga imminut eqqissisarlunga.

Imminut eqqissisarnerit iluatsippa?

- Naami 

Taava qanoq pisoqarpa?

- Ineerarinikuusanni sivisulaartumik mattusimavunga.

Taakku marluk aallaammik aallernissannik siorasaakkatit ilisarisimavigit?

- Naami, iluamiunngitsoq. Oqaluutilaaginnartarpakka.

Qanoq ilillutit umiarsualivimmi aallaammik pissarsisimanerlutit oqaluttuarisinnaaviuk?

- Kamattorujussuuvunga. Taamaattumik aqaguani unnukkut aalisariummut aallaammik aallerpunga. Aqaguanilu imassarsillunga.

Aalisariummi aallaaseqartoq nalunnginnakku?

-Aap.

Aallaammik piginnittoq ilisarisimaviuk?

- Aap, ataatarsiakoraara.

Aallaammik aallereeruit imassarsillutillu susoqassagami?

(Sivisuumik eqqarsarpoq, aaqq.)

- Qanormaa aperivit?

Apeqqut uteqqinneqarpoq.

- Eqqarsarpunga toqutsiniarlunga.

Nalunngiliuk kina toqunniarnerlugu?

- Taamatoqqissaajunngitsoq. Naami...

Sooruna toqutsiniartutit?

- Kamassaqaqigama.

Umiarsualivimmi pisoq sioqqulluguli kamassaqarpit?

- Aap.

Sooruna taama kamassaqartigisutit?

- Naluara sooq taama kamassaqartiginerlunga.

Qanoq sivisutigisumik taama misigisimavit?

- Naluara.

Nassuiaavutit toqutsiniarsimallutit. Nalunngilarput aallaammik aallerlutillu imassarsisimasutit. Aallaat pigiinnarniarlugu eqqarsarpit?

- Tamanna oqaaseqarfiginianngilara.

Illumut eqqarneq

Maanna illumut ungasissumiittumut unnerluutigineqartoq sooq aallaasersorsimanersoq nassuiaammiippugut, tassanimi inuit marluk illup qaavaniittut takusinnaasimavai.

Marsip 22-ani susoqarsimanersoq oqaluttuarsinnaavit?

- Ullaakkut qassutinik aalleqqaarpugut. Ualikkut kamaleriataarpunga. Taava aallaat tiguara, taava sianigiunnaariasaarpunga pisulluunniit tullia eqqaamasinnaanagu. Silattoqqikkama pallungavunga.

Pallungallutit silattoqqipputit. Taava susoqarpa?

- Sivisuumik pallungavunga. Taava naggataagut eqqarpunga.

Kikkut tungaannut eqqarpit?

- Illup qaavani inuit sulisut.

Sooq tungaannut eqqarpit?

- Eqqanngilaarlunga eqqarsarpunga Narsami innuttaasunut tamanut kamassara tutsinniarlugu.

Narsami najugallit toqunniarpigit?

- Aap.

Aallaammik aallaaneq sungiusimaviuk?

- Aap.

Illup qaavaniittut ilisarisimavigit?

- Naami.

Qasseriarlutit eqqarpit?

- Eqqaamanngilara. Immersagarli qulinik imassaqarsinnaavoq.

Toqunniarlugit tungaannut eqqarpit?

- Aap.

Eqqugaqarpit? Takusaqarpit?

- Eqqaamanngilara.

Illup tungaanut aamma eqqarpit?

- Naami, inuit tungaanuinnaq. Illumiittunik takusaqanngilanga.

Inuit illup qaavaniittut sunersut takuigit?

- Sulerpasipput.

Eqqaassileravit suppat?

- Eqqaamanngilara.

Illumut aallaasersornermini susoqarnersoq unnerluutigineqartup eqqaamanngilaa, tassani angutit marluk illup qaavaniipput, illullu iluani pingasunik inoqarpoq. Illu igalaallu aallaaneqarput.

Qulimiguulimmut aallaasersorneq

Illup tungaanut aallaasersoreernerup kingorna unnerluutigineqartoq ima nassuiaavoq:

- Qulimiguulik tikikkiartortoq tusaavara. Taava heliportip tungaanut arpappunga. Meqqammersoq aallaasersorfigaara.

Qanoq qanitsigilerpiuk?

- Aallaasersorfinnit meterit 30-40-llu akornanni.

Sooruna qulimiguulimmut aallaasersortutit?

- Kamaga pillugu.

Narsami najugalinnut kamassaqarnerit pissutaava?

- Aap.

Qulimiguulimmut aallaasersornerit taava nalaatsorneriinnaava?

- Aap.

Taava qanoq pisoqarpa?

- Aallaagama timmisartortartoq umerpara. Taava gummibåd ammukartoq takuara, taamaattumik tassunga tungaanut eqqalerpunga.

Timmisartortartoq ilisarisimaviuk?

- Naami.

Qulimiguulimmut aallaasersornermini aallaasip immersagaa taarsersimanerlugu eqqaamanngilaa. Imassat kaasarfimminiitillugit nassuiaavoq.

Qulimiguulimmi allanik inoqarnersoq takusinnaaviuk?

-Aap. Qulimiguulimmi timmisartortartup saniatigut inoqartoq takusinnaavara.

Qulimiguulimmiittut toqunniarlugit aallaasersorpit?

- Aap.

Eqqortittoqarnersoq takuiuk?

- Naami, takunngilara.

Qulimiguulimmit mittarfiup tungaanut arpattoqarpoq. Tungaanut eqqarpit?

Aap. Eqqaamanngilarali qasseriarlunga aallaasimanerlunga, toqunniarlugilli aallaasimagunarpunga.

- Qulimiguulimmit qimaasimasut malersorpakka, timmisartullu tungaanut pigama igalaavi aserorterpakka aallaasima naqqa atorlugu, qulimiguuliup igalaavi aserorterpakka.

Taava unnerluunneqartoq mittarfiup illutaanut iserpoq, tassanili inoqanngilaq, aqqusinermukarporlu ungasiartumilu scooterertumik takulluni.

- Nipiliorpoq, scooterilu assersorniarsaraara. Sivisuumik aallaasima qinngutaagut isigaara.

Qanoq ungasitsigisumiippa?

- Ungasiarpoq - immaqa 1 kilometeri.

Aqqutissaa asserakku. Aallaat scooterertumut umeqqava?

- Aap. Eqqaamanngilara qanoq oqarfiginerlugu. Nilliavungali oqalullungalu.

Scooterertoq ingerlatiinnarpiuk?

- Aap, naluara sooq.

Tigusarinninneq

Taava qanoq pisoqarpa?

- Kinguninngua tigusarineqarpunga. Qanoq tigusarineqarnerlunga eqqaamanngilara.

Politiit kalerrisaarillutik igittariaqarsimapput. Eqqaamaviuk?

-Inuit marluk ungasissumit takuakka, takuakkalu politiiusut. Aallaasimasorigunarpakka, kisianni qularpunga. Tunginnut aallaasoqarpoq, aallaaseralu aqqusinermut ilivara, ungasilliallugulu nunamut pallorpunga. Tassani pallunganinni sivitsormat mobilinnut sianertoqarpoq. Qatanngutissakora sianertoq tiguara, oqaluttuupparalu politiinit tigusarineqalerlunga.

Taava qanoq pisoqarpa?

- Taava tigusaavunga.

Kalerrisaaraluni igittoqarmat tunniutiinnarpit?

- Aap.

Nalunngiliuk politiit taakkuusut igittut?

- Aap.

Sooq tunniutiinnarpit?

- Ajornerusumik pisoqaqqunagu?

Qanoq pisoqarnissaanik eqqarsarpit?

- Merserisaqanngilanga, kisiannili eqqaamanngilara.

Illersuisup apeqqutai

Illersuisoq Christina Johnsen unnerluutigineqartumut apeqqutissarpassuaqanngilaq, kisimiillunili illumi najugaqarfigisaminiissimanersoq aperaa.

- Aap.

Nerisassat allallu eqqarsaatigalugit imminut isumagisinnaavit?

- Aap.

Unnerluussummi aqqit allassimasut ilisarisimavigit?

- Naami.

Oqqateqateqarsimavutit. Oqqanneq kamassutigiviuk?

- Aap.

Siornatigut kamassat aqussinnaasarsimaviuk?

- Aap, qatanngutinnut sianertarnikuuvunga.

Aalakoortutulli misigisimavit?

- Naami.

Kamannaavippit?

- Naluara, kamassaqaqaangali. 

Eqqarsarpit politiinit tigusaanissat siunertaasimasoq?

- Aap.

Imaassinnaava nammineerlutit tunniutiinnarsimasutit?

- Naami, politiit soqutiginngilakka.

Inuit taakku utoqqatserfigerusuppigit?

- Naami

Tupaqqanerat paasisinnaaviuk?

- Aap. Iluaallappunga. Kamakkunnaamivunga.

Ilisimannittunik nalunaajaasunik killisiuineq

Eqqartuussineq tallimanngorneq tikillugu ingerlassaaq, Narsamilu nalunaajaasut ukiup ataatsip matuma siorna aallaasersortoqarnerani pisut videokkut attaveqarneq aqqutigalugu oqaluttuarissavaat.

Tallimanngorpat eqqartuussisoqarnissaa naatsorsuutaavoq. Unnerluunneqartoq Danmarkimi tarnikkut nappaatilinnut napparsimmavimmi piffissaligaanngitsumik paarnaarussaassasoq unnerluussisup piumasaraa.