Nakorsat peqatigiiffiat
Isumakuluutivut saqqummiuppavut
Nuummi ineqarnermut akiliutit qaffasissut pillugit ajornartorsiut politikikkut aaqqinneqassaaq, taamaanngippat peqqissutsimut isumaginnittunut tamanut ajornartorsiutaalissammat, nakorsat isumaqarput
Annonse
Nunatsinni Nakorsat Peqatigiiffiata Nuummi sulisunut inissiani nutaani ineqarnermut akiliutit qaffasippallaarnerat pillugu ernumassuteqarnertik ersersinniarlugu, Peqqissutsimut aqutsisut ataatsimeeqatigisareerpaat.
- Peqqissutsimut aqutsisut ajornartorsiummik namminneq aaqqiinissamut periarfissaqanngitsut nalunngilarput, ajornartorsiulli politikikkut aaqqiivigineqanngippat, peqqissutsimik isumaginnittunut tamanut ajornartorsiutaalissaaq, Nunatsinni Nakorsat Peqatigiiffianni siulittaasoq Charlotte Mumm Ring oqarpoq.
Nakorsat peqatigiiffiat ineqarnermut akiliutit qaffasippallaarnerat pillugit, ilaasortaminit saaffigineqartarpoq.
- Ineqarnermut akiliutit taakku ineqarnermut allaffeqarfiup maannamut nalunaarutigisartagaanit – maannamullu periaasianit – qaffasinnerujussuupput, oqarpoq.
Tusarfiit arlallit AG-mut nassuiaallutik oqaatigaat, peqqissutsimut isumaginnittuni sulisut inissiat nutaat ilaat itigartikkunikkik ajornartorsiulersinnaasut. Allanimmi periarfissaqarpasinngimmata. Inissianik namminersorlutik attartortitsisartunit inissianik attartussagunik, sulinermut atatillugu inissianut akiliutit qaffaseqatigiinnassavaat. Tamakkunanimi aamma inissiaq marlunnik initalik 10.000 koruunit missaannik akeqarsinnaavoq pingasunillu initalik 14.000 koruuneqarsinnaalluni.
– Ajornartorsiutaagami periaaserineqartumi akuersisoqartariaqarami, - imaluunniit itigartitsisoqarluni, inissiamullu akisuumut itigartitsigaanni inissiamik allamik innersuussisoqarsinnaanani, Charlotte Mumm Ring oqarpoq.
Aalajangersimasunik atorfilinnik amigaateqarneq
- Ineqarneq akisuallaassappat tamanna sulisussarsisinnaanermut qanoq sunniuteqassava?
- Ineqarnermut akiliutit maannamut periaaserineqartunit qaffasinnerujussuupput, nakorsat peqatigiiffianni siulittaasoq.
Charlotte Mumm Ring
- Nakorsanut Kalaallit Nunaannut nuukkusuttunut peqqissutsimillu suliaqartunut ikiuukkusuttunut aningaasartuutit taama qaffasitsigimmata, tamanna nakorsat maanga nuukkusunnissaannut aningaasatigullu ataqatigiissaarisinnaanissaannut aalajangiisuussaaq. Aamma nakorsat aalajangersimasumik atorfeqartut amigaatigaavut, nakorsat peqatigiiffianni siulittaasoq erseqqissaavoq.
- Nakorsat peqqissutsimillu suliaqartut allat pisariaqartinneqarluartut tikisinnissaannut tamanna pingaaruteqarmat qularinngilara.
Charlotte Mumm Ringip oqaatigaa, arlallit ineqarnermut akiliutit qaffasissusiat pissutigalugu suliunnaarsimasut tusarsimallugit.
- Tamanna attanneqarsinnaanngilaq, oqarpoq.
