Illoqarfinni aqqanilinni pinerlunnernik nalunaaruteqartarnerit ikileriartut

Kalaallit Nunaanni Politiit kisitsisaataasa takutippaat Nuummi, Qaqortumi, Maniitsumi Paamiunilu politiinut nalunaarutigineqartartut amerleriarsimasut, illoqarfinnili aqqanilinni ikileriarsimasut.

Kinguaassiuutitigut kannguttaatsuliornerit ikilisimanerat nuannaarutigineqarsinnaavoq, politiilli pisortaata Bjørn T. Bayip oqaatigaa suli aarlerinartumik amerlasut:

- Kalaallit Nunaanni Politiit kinguaassiutitigut pinerlunnerit suli ukkatarissavaat, kinguaassiutitigut pinerlunnerit nalunaarutigineqartartut politiit immikkoortortaqarfiinut allanut sanilliukkaanni suli amerlammata, Politiit pisortaanerata oqaatigaa, innersuussutigalugulu politiinut allanut sanilliullugit Kalaallit Nunaanni pinerlussimanermut nalunaarutigineqartartut 6,4-riaammit amerlanerusut.

Kalaallit Nunaanni Politiit ilisimatitsipput nakuusernerit, meeqqanut ukiukitsunullu  pinngitsaaliinerit kinguaassiuutitigullu atornerluinerit ukiuni arlalinni immikkut eqqumaffigineqartarsimasut. Naak nakuusersimasoqartillugu nalunaaruteqartarnerit amerleriangaatsiarsimagaluartut, kinguaassiuutitigut pinerlunnerit meeqqanullu kannguttaatsuliornerit pillugu nalunaarutit ikileriarsimapput.

Aanngajaarniutit pillugit inatsisinik unioqqutitsinerit amerleriangaatsiarsimasut

Ikiaroornartunik inatsimmik unioqqutitsisimasutut nalunaarutigineqartut 2022-mi 584-iupput, ukiut 20-t sinnerlugit aatsaat taama amerlatigipput. 2023-mi ikilerialaaminerlutik 582-iupput. Kalaallit Nunaanni Politiit naapertorlugit suli amerlaqaat, ilanngaaserisut politiillu ikiaroornartunik pinerlunnerit ukkatarinninnerulernerat peqqutaasinnaasoq, politiit pisortaanerata, Bjørn T. Bayip oqaatigaa. 

- Imigassartorpallaarneq inuiaqatigiinni suli ajornartorsiutaangaarpoq, nakuusernernut kinguaassiuutitigullu inuunerlunnernut pissutaanerpaalluni, politiit pisortaat oqarpoq.