Illerfiup isasoornera limikippallaarneranik pissuteqarsinnaavoq

 Kalaallit Nunaanni ilisinermi illerfiit atorneqartartut ajoquteqanngillat. Tamanna illerfissanik sanaartortup tusagassiuutinut Kristeligt Dagblad-imut nalunaarutigisimavaa. Tusagassiivik naapertorlugu illerfiliortartoq taanna ukiuni 100-nit amerlanerusuni taamatut suliaqartarsimavoq.

2023-mi decembarip 23-anni illerfik ilisinermi isasimasoq februaarip aallartinnerani Sermitsiap allaaseraa. Iliveqarfimmi qanigisaasut inuunerminni misigerusunngisaannakkaminnik misigisaqarsimapput, palasip sapinngisaminik iliuuseqarniarnerani.

Ulloq taanna ajutoorsinnaasut tamarmik ajutoorsimasut palasi Sermitsiamut oqarpoq, kingusinnerusukkullu arlalitsigut pissuteqartumik soraarniuteqarsimavoq.

Illerfiit pissutaanngitsut

Illerfiit taakku aserujavallaarnersut Kristeligt Dagblad-imi misissorneqarpoq.

- Assimi takujuminaappoq, kisianni illerfiit katiterneqarneranni lim-i naammanngitsoq atorneqarsimasoq nalilersinnaavara, illerfinnik sanaartorfiup pisortaa Glenn Goltermann Lassen, Kristeligt Dagblad-imut allappoq.

- Illerfiit nammineerluta katitertinnagillu kiffiartinnagit, illerfiit qanoq katiterneqarlutillu kiffiarneqarnersut soorunami akisussaaffigisinnaanngilarput. Soorunami siunissami illerfinnik katiterneqarsimanngitsunik Kalaallit Nunaannut assartuisassanerluta eqqarsaatigineqassaaq, maannakkummi pissutsit taamaatillugit qanoq katiterneqassanersut kiffiarneqassanersullu akisussaaffigisinnaanngilarput, Glenn Goltermann Lassen oqarpoq.