Ilisimatusarfimmi sulisut siulersuisunik sakkortuumik isornartorsiuipput

Qullersat siulersuisullu akornanni eqqissiviilliortoqarnera pissutigalugu, Ilisimatusarfimmi sulisut qassiuneri ilisimaneqanngitsut, ilinniarnermut naalakkersuisoqarfimmut allagaqartariaqarsimapput.

Isumakuluuteqarnermut allagaq, siulersuisut iliuusaanut naalakkersuisoqarfimmit iliuuseqartoqarnissaanik kaammattuisoq, allakkanik takunnissinnaaneq aqqutigalugu Sermitsiap takusinnaasimavaa.

Toqqissisimanngitsut

Ilisimatusarfimmi pissutsit ima ajortigisimagunarput, allaat isumakulunnermut allakkiaminni sulisut atiminnik ilanngusserusussimanatik, tamannalu ima nassuiaasersorpaat:

- Ilisimatusarfimmi pissutsit ima ajortigilersimapput, isumakulunnermut allakkatsinni atsiornissarput allaat toqqissisimartinnatigu.

Ukiuni kingullerni qullersat siulersuisullu akornanni eqqissiviilliortoqarneranik takunnissimanerminnik, sulisut allakkaminni aallaqqaammut allapput.

- Tamanna aqutsisut akornanni atorfilinnik, soorlu naatsorsuuserisumik kingullermillu Ilisimatusarfimmi pisortamik, soraartoqarneranik kinguneqarpoq. Siulersuisut piginnaatitaanerminnik qaangiillutik annikitsualuit pillugit aqutsinerannik, aamma ataatsimiinnerni sulisunut peqqarniitsumik pissusilersortarnerat pillugu sulisut oqaluttuartarput, allakkami allassimavoq.

Ilisimatusarfimmi rektori “siulersuisut ataatsimiinnerannit tunuartariaqarsimasoq” oqaatigineqarpoq.

Isummakkut peqqissuseq unammillerneqartoq

- Siulersuisut Ilisimatusarfimmi suliassaminnik isumaginninnerat qullersat isummakkut peqqissusaannut ajoqusiinissaa ernumanartorujussuuvoq, sulisut allapput. "Aqutsisut iliuuseqanngitsoortarnerannik aalajangiisinnaassutsimillu nalornissuteqarnerannik" kinguneqarnerarpaat.

"Siulersuisut maannakkutut ingerlaannarsinnaappata" Ilisimatusarfiup ineriartornera akornuserneqarsinnaasoq sulisut ernummatigaat.

Siulersuisunut ilaasortat qaqugukkut tunuartinneqartarpat?

Paragraf 10 imm. 3 qaqugu  Namminersorlutik Oqartussanit atuutilersinneqassanersoq allakkami innersuussutigineqarpoq, taannalu uumunnga tunngassuteqarpoq: " Siulersuisunut ilaasortaq siulersuisut akisussaaffiannik sakkortuumik sumiginnaasimasoq, imaluunniit siulersuisuni sulinissamut imminut naleqqukkunnaartissimasoq Naalakkersuisut tunuartissinnaavaat."

Ilinniartitaanermut naalakkersuisoqarfik suliamut akuliuteqquaat.

- Anguniagaqarneq siunissamillu takorluuisinnaaneq pilerseqqinniarlugit, allakkaminni, 2024-mi marsip sisamaani ullulerneqarsimasumi, allapput.

Isornartorsiuineq siulersuisut ilisarisinnaanngilaat

Siulersuisut siulittaasuannut Suzanne Møllerimut isornartorsiuineq Sermitsiap saqqummiuppaa, siulersuisullu tamanna ilisarisinnaanngikkaat allakkatigut akissummini allappoq:

- Siulersuisut tamarmik allakkami isumakuluummi pissutsit taakkartorneqartut ilisarisinnaanngilaat. Tamanna uppernarsarniarlugu siulersuisoqatigiit ataatsimiinneri tamarmik tamanut saqqummiunneqartarput, Suzanne Møller allappoq.

Siulittaasoq naapertorlugu siulersuisut naalakkersuisoqarfik allakkatigut allaffigisimavaat, isumakuluutinillu allakkat tunngavigalugit naalakkersuisoqarfik ataatsimeeqatigisimallugu.

Ilisimatusarfiup nittartagaa naapertorlugu siulersuisut (ilaasortaat avataaneersut) ullumikkut imaapput:

• Suzanne Møller, Ilisimatusarfimmi pisortaasimasoq rektoriusimasorlu (siulittaasoq)
• Karsten Høy, Pisortaaneq (siulittaasup tullia)
• Svend Hardenberg, Pisortaq
• Malan Marnersdóttir, Professori
• Ross Virginia, Professori
• Inaluk Brandt, Siunnersuisartoq