Ilaasunik angallassinermi pissutsit tunngaviusut allanngorsimapput

Avannaani Kujataanilu ilaasunik angallassinermi unammilligassat aalajangersimasut pillugit, aaqqiissutissat iliuuserisassallu utaqqiisaasumik atuutsinneqalersut, Atortulersuutinut naalakkersuisoq Hans Peter Poulsen (S) Sermitsiamut oqarpoq.

Siunissaq ungasinnerusoq eqqarsaatigissallugu taamatulli pingaaruteqartigaaq, maannami kiffartuussinissamut isumaqatigiissutinut piumasaqaatit arlallit allanngorujussuareersimapput.

Borgmesterit pingasut Avannaani, Kujataani Tunumilu ilaasunik angallassinermik isornartorsiuillutik qaammammi matumani siusinnerusukkut taamatut oqariartuuteqarput.

Air Greenlandip qulimiguuliutaa nutaaq ajornartorsiuteqarpoq

Napparsimasut katsorsarneqarniarlutik angalasinnaanngillat, angalasut ulluni arlalinni kinguaattoortarput poortukkallu aamma eqqugaasarput. Tamakku ilaatigut isornartorsiorneqarput.

Ajornartorsiutit aaqqinniarlugit ingerlaavartumik angallassisut Naalakkersuisunit oqaloqatigineqartartut, Hans Peter Poulsen oqarpoq:

- Kujataani qulimiguulimmik piareersimasumik pilersitsineq aaqqiissutissat kingulliit ilagaat. Tamanna taarsiutaavoq, tassa kinguaattoornerit annertuppata qulimiguulik piareersimasoq atorneqarsinnaalissaaq. Maannakkut taamaappoq, immaqali qulimiguulik kingusinaarluni aallartinneqarpoq.

- Tunumi qulimiguulimmik piginnittoq Air Greenlandip aamma suleqatigaa, tassanilu assingusumik aaqqiissuteqarniarsarivoq, tassa qulimiguulik namminersortumit pigineqartoq utaqqiisaasumik atorneqartassaaq. Tassa imaappoq kinguaattoortoqarnissaanut piareersimatillugu taanna atorneqarsinnaavoq, Hans Peter Poulsen oqarpoq, taassumalu aamma Avannaani ajornartorsiutit nassuerutigai:

Takornarissat amerlapput — inissat ajornartorsiutaapput

- Qulimiguulimmik pisinikkut teknikkikkut ajornartorsiuteqartoqarsimasoq qularnanngilluinnarpoq, tamannalu aamma Air Greenlandip nassuerutigaa, tamannali aaqqinneqarsimavoq.

Ilaasunik angallassinermi kiffartuussinissamik isumaqatigiissutit tunngaviusut allanngorsimanerannut ajornartorsiutit aamma attuumassuteqartut, Naalakkersuisoq isumaqarpoq.

Ilimagisamit ilaasut amerlanerusut tikissimasut, Hans Peter Poulsen ilaatigut oqarpoq:

- Mittarfiit nutaat aatsaat naammassineqareerpata takornarissat amerlanerusut tikerarnissaat naatsorsuutaanikuuvoq, siornali coronap kingorna tassanngaannaq tikerarput. Taamaattumik angallassinermi unnuisarfinnilu Kalaallit Nunaanni tamarmi ukioq kingulleq unammillerneqarpugut. Ukioq mannalu suli tamanna ingerlaqqittoq takusinnaavarput.

- Angalasut amerliartuinnarmata maannamut angallassisinnaanerput unammillernartorujussuuvoq, Hans Peter Poulsen oqarpoq.

Ilimasaarutit eqqoqqissaarnerit nutaallu sulissutaasut

Silap pissusiata allanngoriartorneranut Hans Peter Poulsen aamma innersuussivoq:

- Silap allanngorarnerujartornera, nittaallernerunera siallerneruneralu pissutigalugit timmisartuussinerit ilaat taamaatiinnarneqartarsimapput, oqarpoq allamillu assersuuteqarluni:

- Uummannap kangerluani siku allanngorsimavoq. Siornatigut angallannermi ajornartorsiortoqartillugu Qaarsunut taxanik imaluunniit qamuteralannik angallattoqarsinnaavoq, maannakkulli siku allanngormat taamaaliortoqarsinnaajunnaarpoq.

Kiffartuussinermut isumaqatigiissutimmi allannguutit pissutigalugit, siunissami atortulersuutit allatut eqqarsaatigineqassasut Naalakkersuisoq oqarpoq:

- Mittarfiit nutaat naammassippata Kalaallit Nunaanni tamarmi atortulersuutit qanoq sunnerneqartarnersut pillugit paasissutissat tunngaviusut eqqoqqissaarnerusut ersarinnerusullu pissarsiarisinnaajumallugit, atortunik nutaanik sulissuteqarpugut.

- Suliaq tamanna pingaaruteqartorujussuuvoq, takornarianuinnaanngitsoq angalasunuinnaanngitsorlu, aammali upalungaarsimanerup peqqinnissaqarfiullu pisariaqartitaannut atortulersuutit pingaarutillit  atorneqartartut pineqarmata, Hans Peter Poulsen oqarpoq.