Hashimik naatsorsuinertik politiit naqqiissutigaat
Kukkuneq pissutigalugu hashimik arsaarinnissutaasumik naatsorsuinertik Kalaallit Nunaanni Politiit annertusivaat.
Kalaallit Nunaanni Politiit 2023-mut naatsorsuusiaat, sapaatip-akunnerata siuliani saqqummersinneqartoq, kukkuneqarpoq.
Hashimik arsaarinnissutigineqartut annertussusaat eqqortumik naatsorsorneqarsimannginnerat pissutigalugu, kisitsisit maanna nutarterneqarlutillu saqqummerseqqinneqarput.
- Hashi Nuummi Qasigiannguanilu arsaarinnissutigineqartoq arsaarinnissutigineqartut katillugit amerlassusaannut ilanngunneqarsimanngitsoq paasinarsivoq, taamaattumillu 33 kiilungajannik annertuneruvoq.
- Taamaalilluni 2023-mi hashi 96 kiilungajak arsaarinnissutigineqarpoq, Kalaallit Nunaanni Politiit allapput.
2022-mi hashi 130 kg-nik oqimaassusilik arsaarinnissutigineqarpoq.
2023-mi aanngajaarniutit pillugit suliat 580-t politiit suliaraat, taakkunannga hashi suliani annertunerpaalluni. Suliani 46-ni iioraanikkut eqqusseriartoqarpoq.