Gazami inuiannik toqoraanermut Naalakkersuisut nipaannerat ersersinniarneqartoq

Nuummi Hans Egedep Illuata eqqaani seqinnarissumi anoreqanngingajappoq. Illu oqaluttuarisaanermut tunngasoq qulaallugu drone timmivoq, politiillu arlaqanngitsut illup sioraani tunuanilu nakkutilliillutik. Atorfilittat, ilulliinnaallutik qernertunillu qarlillit illumit anisaqattaarlutillu iseqattaarput, tusagassiortunik katersortitsinissamut piareersarlutik. 

Tamatumunnga pissutaasoq tassaavoq EU-p Nuummi allaffiata sivisuumik utaqqineqartup ammarneqarneranut atatillugu, EU-Kommissionip siulittaasuata Ursula von der Leyenip Danmarkillu ministeriunerata Mette Frederiksenip tikeraarnerat.

EU-lli Nunatsinniinnerminik nukittorsaanera pingaarnerutinnagu illup silataani allarluinnarmik pingaartitsisoqarpoq.

- Ulloq akerliussutsimik takutitsinissamut piukkunnarluartuugami, angut Hans Egedep Illuata saavanut takkussimasunut 25-t missaanniittunut allagartarsuarnik agguaasoq oqarpoq.

"From the icecap to the sea everyone will be free", (Sermersuarmit immamut kikkut tamarmik kiffaanngissuseqassapput), "Múte sooruna nipangersimaannarpit?" aamma "Free Palestine" (Palæstina kiffaanngissusilik), allagartarsuit ilaanni taama allassimasoqarpoq.

”Israel mattussiuk”

Europamit tikeraartoqarnera inuiannik toqoraasoqarneranik Kalaallit Nunaata akuerinninnginneranik ersersitsinissamut periarfissatsialaavoq, Alfred Victor Hansen akerliussutsimik takutitseqataasoq oqarpoq.

- Pisimasunik sulilu pisartunik amiilaarnartunik, soorlu Gazami inuiannik toqoraanermik, akuerinninnginnitta takutinnissaa pingaaruteqarluinnarpoq. Politikerinut, iliuuseqarnissamut oqaasissaqarlutillu pissaaneqartunut, akerlilersuinissaq pingaaruteqarpoq,“ Alfred Victor Hansen, nipilersortartoq oqarpoq.

Danmarkip EU-llu Israelimik niueqateqarnermikkut sakkunillu pilersueqataanermikkut, Palæstinami inuiannik toqoraaneq tapersersoraat, taanna isumaqarpoq. Tamatumunnga taarsiullugu Danmarkip Israel mattulluinnartariaqaraluarpaa, sorsunnerallu toqqaannartumik isornartorsiorlugu.

Nunat ikittuinnaat taamaaliornissaminnut sapiissuseqarput, Danmarkili Kalaallillu Nunaat sapiillisaarlutik oqarpata: - Hey, tamanna ajortuuvoq, tamannalu akuerinngilarput,“ taava nunat amerlanerujartuinnartut taamaaliorumassagaluarput, Alfred Victor Hansen oqarpoq.

Mette Frederiksen Nuummut kingullermik tikeraarmat, spiralilersuisimanermut tunngatillugu akerliussutsimik takutitsisunit aamma naapinneqarpoq.

- Akerliussutsimik takutitsinerit tamaasa killinneqaatigaakka. Kingullermik maaniikkama aamma taamaappoq, spiralilersuisimaneq pillugu suliaq sammineqarmat. Ullumikkut nunanut allanut tunngasut sammineqarnerugunarput. Kisianni akerliussutsimik takutitsinerit tamaasa soorunami maluginiartarpakka, Mette Frederiksen tallimanngornermi tusagassiortunik katersortitsinermi Sermitsiamut oqarpoq.

Tamanna aamma maanga sunniuteqarpoq

Filmiliornermik ilitsersuisartup Aka Hansenip akerliussutsimik takutitsineq aaqqissuuppaa, taasimallugulu 'Inuit against genocide' (Inuit inuiannik toqoraaneq akerleraat). Akerliussutsimik takutitsinermi isumassarsiorfigineqarluni taama assingusumik Savalimmiuni ippassaammat akerliussutsimik takutitsisoqarnera, tamatumani EU-Kommissionip siulittaasuata aamma Aksel V. Johannesenip, Savalimmiuni naalakkersuisut siulittaasuata, suleqatigiinnerunissamut qulakkeerinnittussamik isumaqatigiissut atsioqatigiissutigimmassuk.

- Mútep, Mettep Ursulallu sunik pingaartitaqarnitsinnik takutitsiviginissaannut periarfissatsialaavoq. Kangiani Qiterlermi inuiannik toqoraanermut akerliusariaqarput, Ruslandip Ukrainemik tiguaaneranut akerliunermissulli.

- Soormiuna Kangiani Qiterlermi ungaseqisumiittumi pisut uagut Nunatsinni soqutigisariaqarivut?

Danmarkip Kangiani Qiterlermi inunnik pisuussuteqanngitsunik toqutsinissamut sakkussiat pisiarinissaannut aningaasaleeraangami uagutsinnut aamma sunniuteqartarmat.

Gazap killeqarfia matuneqarpoq, palæstiinalillu 2,3 millionit missaanniittut nunap iluani qimaasariaqarsimapput. Taamatut Reuters naapertorlugu FN nalunaarpoq.

- Uatsinnut aamma sunniuteqarmat, tassami Kangiani Qiterlermi inuit pisuussuteqanngitsut toqorarneqarnissaannut Danmark sakkunut aningaasalersueqataammat. Taamaaliorsinnaagunik nunani allani aamma taamaaliorsinnaassappat?

Gazamit oktobarip 7-ianni peqqarniisaarluni saassussisoqarnerani, Israelimiut 1200-ngajaat Hamasimit toqutaanerannut, Israelimiut sakkutuuisa aattaqaqisumik akisillutik saassussineranni Palæstinamiut 30.000-init amerlanerusut toqorarneqarput. Toqutaasut ilarpassui meeraapput. Gazami peqqissutsimut oqartussat Hamasimit nakkutigineqartut taama ilisimatitsipput. Gazamut killeqarfiit matoqqatinneqarput. Palæstinamiut Gazami najugaqartut 2,3 millioniusut 90 procentiisa missaat, Gazami namminermi qimaatitaasimapput. Naalagaaffiit Peqatigiit Reutersimit taama issuarneqarput.

Múte neriorsuisoq

Akerliussutsimik nipaatsumik takutitsisoqarpoq, tamannalu Naalakkersuisut siulittaasuannut Múte B. Egedemut sakkortuumik malugitinniarneqarluni. Nipaatsumimmi akerliussutsimik takutitsinermi ersersinniarneqarmat, tassami nunami pissaanillit Gazami sorsunnermut ”nipaarluunerat maluginianngitsuugassaanngimmat”.

- Palæstinami sorsunneq inuiannillu toqoraaneq pillugit Múte oqaaseqarnikuunngilluinnarpoq, nipaarluunera maluginianngitsuugassaanngilaq, Aka Hansen oqarpoq.

Naalakkersuisulli siulittaasuata nipaannini tallimanngormat kipitippaa, tassa Mette Frederiksen aamma Ursula von der Leyen peqatigalugit tusagassiortunik katersortitsereernerminni anillannerminni oqaaseqarami. Tamatumani Múte B. Egedep akerliussutsiminnik takutitsisut takkussimasut qujassuteqarfigai, neriorsuillunilu nunarsuarmi aaqqiagiinngitsoqartillugu erseqqissumik isummertassalluni.

- Isummasi ataqqivakka, tusaavaralu oqariartuutigigissi nunarsuarmi pissutsinut isiginnittaaserput erseqqarinnerulertariaqartoq, Múte B. Egede oqarpoq.

Aka Hansen oqarpoq oqaasii aatsaat isumaqartinneqarpata pingaaruteqartut. 

Oqaasiinnarnik oqalunnginnissaq pingaaruteqarpoq. Ullumi oqaasiisa iliuuseqarfigineqarnissaat kissaatigaara. Oqaasiinnarnik oqalukkaanni imaqanngitsuullunilu pingaaruteqarnavianngilaq, Aka Hansen oqarpoq, taannalu Inatsisartut upernaakkut ataatsimiinnerisa ammarneqarnerannut atatillugu apriilip tallimaanni akerliussutsimik takutitseqqinnissamik pilersaaruteqarpoq.

Oqaluinnarnissarli naammanngitsoq, Aka Hanen oqarpoq.

- Oqaasiinnanngippata tamanna pingaaruteqassaaq. Ullumikkut oqaatigisani timitalissagai takorusuppara. Oqaasiinnaassappatami, oqaatsit imaqarnavianngimmata soqutaanatillu, Aka Hansen oqarpoq, taassuma Inatsisartut upernaakkut ataatsimiinnerat apriilip tallimaanni aallartippat akerliussutsimik takutitsisoqarnissaa pilersaarusiuleruttorpaa.