EU-p Nuummi allaffissaa isumaqatigiissutigineqarpoq

EU-kommissionip siulittaasuata Ursula von der Leyenip EU sinnerlugu Nuummi qaaqqusisussatut isumaqatigiissut tallimanngorpat marsip 15-iani atsiorumaarpaa, ministeriunerlu Mette Frederiksen aamma Naalakkersuisut siulittaasuat Múte B. Egede qallunaat kalaallillu sinnerlugit atsiorumaarput.

- Aalisarneq ilinniartitaanerlu pillugit suleqatigiinnerup nukittorsarnissaanut, taamaalillunilu EU-p Kalaallit Nunaannik Danmarkimillu isumaqatigiissutaata piviusunngortinnissaanut allaffik tapersersuissaaq, nunanut allanut ministeriaqarfik ilisimatitsivoq.

EU-mi sulisut sisamat

Suliassaqarfinni nutaani pingaarnersiuinermi, soorlu aatsitassanut, silap pissusianut nukissiornermullu tunngasuni, EU-p Kalaallit Nunaatalu suleqatigiinnerat EU-p allaffiata nutaap nukittorsarumaaraa samma naatsorsuutigineqarpoq.

Tallimanngorpat atsioqatigiinnerup kingorna allaffik pisortatigoortumik ammarneqassaaq, tamatumalu kingorna EU-Kommissionip Nuummi allaffiup ammarnissaanut piareersarnerit ingerlatiinnassavai.

EU-p allaffiani sulisut sisamaassasut naatsorsuutigineqartoq ilisimatitsissutaavoq.

Nuummi allaffimmik ammaanissaq 2022-mi maajimi aalajangerneqarpoq, aammalu EU-Kommissioni pillugu isumaqatigiissut allaffiullu qanoq atuunnissaa pillugu Nunanut allanut Ministereqarfiup Naalakkersuisullu februaarimi isumaqatigiissutigisimavaat.

Inatsisitigut tunngavissaq

- Allaffiup Nuummiinneranut qaaqqusisussatut isumaqatigiissut inatsisitigut tunngaviliissaaq, EU-Kommissionillu sulisuisa suliaminnik suliaqarnerminni immikkut pisinnaatitaaffeqarnerannik unnerluutigineqarsinnaannginnerannillu qulakkeerinnittussanngorlugu, Nunanut allanut Ministereqarfik Kalaallit Nunaat pillugu Ataatsimiititaliamut paasissutissiivoq.