Eqqissilluni isumaqitiginninniarnissaq kissaatigigaat
Atorfillit Kattuffiata (AK) oqartussatut sullissinermi tapi peerlugu siunnersortinut tapimik taarsiinissamik Naalakkersuisut siunnersuutaat suli isummerfiginngikkaa kattuffiup tusagassiuutinut nalunaarummi naqissuserpaa.
Annonse
Inunnik isumaginninnermi siunnersortit peqatigiiffiata NIISIP illoqarfinni arlalinni akerliussutsimik takutitsinissaq sapaatip akunnerani matumani pilersaarutigigaluarpaa. Peqatigiiffiup oqarnera naapertorlugu aningaasarsiami tapiissummik annaasaqartussanngoraluarmata.
Atorfillit Kattuafiata, inunnik isumaginninnermik siunnersortit sinnerlugit Namminersorlutik Oqartussanut isumaqatiginninniartartut, maanna eqqissisaallutik nalunaaruteqarput; Ajornerulersitsiniarluni isumaqatiginninniarnissaq siunertarineqanngilaq. Aamma ajornermik atugassaqartitsilerluta isumaqatigiissuteqarsimanngilagut, Atorfillit Kattuffianni siulittaasoq Dina Olsen nalunaaruteqarpoq.
Aningaasarsianut tapeq pineqartoq allamik taarsernissaa isumaqatiginninniutigineqartoq AK-p tusagassiuutinut nalunaaruteqarnermini nassuiaatigaa:
- Naalakkersuisut siunnersuutaata imarerpiarpaa oqartussatut sullissinermi tapip, isumaqatigiissummi maanna atuuttumi pineqartup peerneqarnissaa. Taarsiullugu siunnersuutigineqarpoq siunnersortinut tapimik, siunnersortinut amerlanerusunut tunniunneqartartussamik atuutilersitsinissaq.
Akissarsianut qaffaatissaq appariassanngilaq
- Taassuma saniatigut siunnersuutigineqarpoq isumaqatigiissummik atuisut tamarmik suliartoqquneqaratarsinnaanermut tapeqartinneqalernissaat. Isumaqatigiissummik atuisut akissarsiaasa nalinginnaasumik qaffaatissaat tamarmiusut appariaateqarnavianngillat, AK allappoq. Isumaqatiginninniarnerillu suli ingerlammata Naalakkersuisut siunnersuutaat isumaqatiginerlugu akerlerinerluguluunniit oqaaseqarfigisimanagu ilanngullugu naqissuserlugu.
NIISIP akerliussutsimik takutitseqqusinera nalunaarutigineqarmalli AK ilaasortanit ernumasunit amerlasuunik saaffigineqaqattaarpoq.
Kattuffik eqqissilluni isumaqatiginninniarusuppoq, ilaasortalli saaffiginnikkusuttut suli tikilluaqqusaapput:
- AK-p ilaasortani tamaasa kajumissaarpai isumaqatigiinniarnerit maanna ingerlanneqartut, suliap ingerlanera imaluunniit isumaqatigiissutip allannguutigiumaagaata ilaasortanut sunik kinguneqarsinnaanera pillugit nalornissuteqarunik AK-mut saaffiginneqqullugit, kattuffik allappoq.
