Eksemimut akiuinermut nuna tamakkerlugu suliuteqartoqalersoq
Narsaq illoqarfinni angalanermi siullersaalluni Eksemertut Atuarfianniit tikinneqassaaq. Tassani eksemi qanoq katsorsarneqarsinnaanersoq pinngitsoortinneqarsinnaanersorlu ilinniartitsissutigineqassaaq.
Nunatsinni meeqqat pingajorarterutaat atopisk eksemimik atugaqartut, nunanut allanut sanilliullugit kisitsisit annertoorujussuusut misissuinerit takutippaat.
Dronning Ingridip Napparsimmavissuani misiliutitut suliniut siorna aallartinneqarpoq, tassani ammip qanoq paarineqarnissaanik pinaveersaartitsinermullu tunngasunik paasissutissiisoqartanissaa anguniarneqarluni.
Narsaq siullerpaalluni "atuarfimmiit" tikeraarneqassasoq, nakorsaq immikkut ilisimasalik, Lone Hove, ilisimatitsivoq:
- Eksemertut Atuarfiat aaqqissuussaanera imaappoq, meeqqeriviit, atuarfiit allanillu meeqqanik sullissisunik naatsumik pikkorissaasarpugut. Taassumap saniatigut peqqinnissamik sulialinnut saqqummiisarpugut atopisk eksem pillugu, eksem meeqqat atugaat. Angajoqqaanut, tamanullu ammasumik aaqqissuussinermi kikkulluunniit periarfissaqarput saqqummiinermi, ilinniartitsinermi apeqquteqarsinnaanermilu peqataasinnaallutik.
Kalaallinut naleqqussagaq
- Suliaq nuannersumik ingerlakkusuttarparput aamma atopisk eksem pillugu paasissutissanik pissarsiaqarnissaq qulakkeerusuttarlugu, nakorsaq immikkut ilisimasalik Lone Hove oqarpoq.
Atopisk eksemi pillugu ilisimasat kalaallit atugaannut tulluarsarlugit inerisarnissaanut suliareqqissinnaanissaanut Den A.P. Møllerske Støttefond aamma LEO Foundation periarfissiisuupput.
Tulluarsaanissaq pingaaruteqartoq, nunanilu allani suliaasut ilaarneqarsinnaanngitsut, Lone Hove oqarpoq. Atopisk eksem pillugu ilinniartitsinermi aniorneq qanoq pinaveersaartinneqarsinnaanersoq kiisalu meeqqanut inuusuttunullu eksem sunik kinguneqarsinnaasarneranik ilinniartitsissapput.
Amminut tunngasumik peqqissaasoq saqqummiissaaq
Paninnguaq Boassen amminut tunngatillugu peqqissaasuusoq ilinniartitsissaaq:
- Qanittumi misissuinerit takutippaat, Kalaallit Nunaanni meeqqat pingajorarterutaat atopisk eksem-imik atugaqartut, nunanut allanut sanilliullugit kisitsisit annertoorujussuupput.
- Tassunga peqqutaagunarpoq pissutsit assigiinngitsut, soorlu silaannaap panernera, kingornutakkat immaqalu aamma peqqutit allat misissugassagut, qilanaarpugullu, Paninnguaq Boassen oqarpoq.
Eksemskolep nunatsinni sumiiffiit arfinillit arfineq-pingasullu akornanniittut tikissavai, tassani upernaakkut aasakkullu pissallutik. Ilaatigut pilersaarutaavoq Qaaanaaq Qeqertarsuatsiaallu tikinnissaat.