Demokraatit siulittaasuat atuuffimmini ingerlaqqittoq

Demokraatini aqutsisut, aallartitat partiimilu ilaasortat ulluni makkunani nuna tamakkerlugu ileqquusumik ataatsimiigiarlutik Nuummiipput.

Nuna tamakkerlugu ataatsimiinnermi ileqquusut malillugit tallimanngornermi ualikkut siulittaasumut qinersisoqarpoq. Tassani partiip siulittaasua Jens-Frederik Nielsen qinigassanngortilluni.

Ataatsimiinnermi pinartoqannginnissaa siulittaasup ilimagereersimavaa, taamannalumi piviusunngorluni partiip siuttuinik qinersisoqarpoq.

- Qinerneqaqqinnera nuannaarutigaara suliamalu nanginnissai qilanaaralugit. Isumaqarpunga, Demokraatit pitsaasumik inissisimasut, sineriammiillu tamarmik inunnit tapersersorneqarneq kaammattorneqarnerlu malugisinnaavara. Tamassuma siunissamut isumallualersippaanga, Jens-Frederik Nielsen tusagassiorfinnut nalunaarummi oqarpoq.

Partiip siuttui:

Jens-Frederik Nielsen, siulittaasoq.

Anna Wangenheim, politikkikkut siulittaasup tullia.

Nivi Olsen, aaqqissuussaanikkut siulittaasup tullia.

Malene Vahl Rasmussen, aningaaserisoq.

Taakku sisamat unammillerteqaratik qinerneqartut Rachel Ingemannimik, Margrethe Thårup Andersenimik Lena Ravn Davidsenimillu siulersuisuuneeqateqalerput.

Partiip nuna tamakkerlugu ileqquusumik ataatsimiinnera sapaatip akunnerata naanerani ingerlanneqarpoq.

- Uani sapaatip akunnerata naanerani pisassaqaqaagut, pikkorissarnerit assigiinngitsut ingerlanneqassallutik, politikkikkut oqallinnerit aammalu, sinerissamiit demokraateqatit ilikkarnerunissaannut periarfissaqarluarluni, Jens-Frederik Nielsen oqarpoq.

Jens-Frederik Nielsen 2020-mi siulittaasunngorpoq, taamani siulittaasuusup Niels Thomsenip napparsimanermini sulinngiffeqartup politikki qimammagu.