KL

DK

AKI-MATHILDA HØEGH-DAM (S)

Danskit naalakkersuisuinut ikiuunnissaminut piareersimasoq 

Danmarkimi naalakkersuisooqataasoq Venstre ilaasortaatitaminik ataatsimik ilanngarpoq. Tamanna isumaqarpoq atlantikup avannaani folketingimut ilaasortat ilanngutissanngikkaanni danskit naalakkersuisooqatigiivi 86-inik ilaasortaatitaqalernermikkut amerlanerussutaaruttut, illuatungiliuttut 87-inik ilaasortaatitaqarmata. Folketingimi ilaasortaq Aki-Matilda Høegh-Dam, aamma Socialdemokratit Folketingimi gruppiani ilaasortaasoq, naatsorsuutiginngilluinnakkamik pisoqartillugu Danmarkip iluani pissutsinut akuliuttariaqalersinnaavoq. Taamatulli pisoqassagaluarpat, Kalaallit Nunaannut iluaqutaasussanik piumasaqaateqarnissani piareersimaffigaa.

Aki-Matilda Høegh-Dam (S) naatsorsuutiginngilluinnakkaminik pisoqassagaluarpat danskit iluminni politikkikkut aaqqinniagaannut akuliuttariaqalersinnaavoq folketingimi amerlanerussuteqartitsinissaq qulakkeerinneqataaffigalugu. - Taamatut pisoqarsinnaanera naatsorsuutiginngilara. Kisianni maannakkut danskit naalakkersuisooqatigiivi ikinnerussuteqalerput, taamaattumik taamatut pisoqarsinnaanera annertusivoq. Naatsorsuutiginngisannik taamatut pisoqassappat, Kalaallit Nunaannut iluaqutaasariaqarpoq, taanna Sermitsiap nittartagaanut oqarpoq.
Jensine Berthelsen
Tusagassiortoq / Journalist

Folketingimut ilaasortaq Aki-Matilda Høegh Dam (S) naatsorsuutiginninngilaq, danskit politikkianni allannguutit annertuut pisassasut.

- Socialdemokraatit aamma danskit naalakkersuisooqatigiivi suleriaaseqarput folketingimi amerlanerussuteqarnissaq qulakkeerniarlugu illuatungiliuttut partiivinut isumaqatigiinniartarlutik. Tamanna ingerlaannassasoq naatsorsuutigaara, Folketingimi ilaasortaq Aki-Matilda Høegh-Dam Sermitsiap nittartakkatigut nutaarsiassaqartitsivianut oqarpoq nangillunilu:

- Kisianni naatsorsuutiginngisamik pisoqassagaluarpat uanga aamma Atlantikup avannaamiut Folketingimi ilaasortaatitakka "oqimaalutaavimmi aalajangiisunngorsinnaavugut". Aamma danskit iluminni pissutsit pillugit  akuliunnissara soqutiginngikkaluarlugu, taamatut inisseratarsinnaanera pisinnaammat nalilersuilluarnissara sillimaffigaara Høegh-Dam erseqqissaavoq.

Aki-Matilda Høegh-Dam aamma oqaluttuarpoq, folketingimi ilaasortanngornermi kingorna marloriaannarluni sillimasariaqarsimalluni. Taamaattorli akuliunissani pisariaqarsimanngitsoq, taasinerit taakku sioqqullugit danskit naalakkersuisui amerlanerussuteqarnissamik isumaginnissinnaasimammata.

Kalaallit Nunaannut iluaqutaassaaq

Aki-Matilda Høegh-Dam erseqqissaavoq, oqimaalutaavimmi aalajangiisussanngortussanngussagaluaruni tamanna piumasaqaataanngitsumik pinavianngitsoq, taassuma taasinerata aalajangiisuussappat. Socialdemokraatit gruppianni ilaasutut isigineqaraluarluni, tamanna isumaqannginnerarpaa piumasaqaatitaqangitsumik taasinissani pissariarineqaannarsinnaaassasoq, amerlanerussuteqarnissamik qulakkeerinninnissamut:

- Uummatikkut socialdemokraatuvunga. Kisianni eqqaamassavarput, aamma uagut anguniakkagut naleqartitagullu imminnut assingugaluarlutik,  aamma assigiinngissuteqarmata. Siumut Kalaallit Nunaanni Socialdemokraatillu Danmarkimi, taakku assigiinngissuteqarput, tassami nunatsinnik tamatta salliutitsilluta sulivugut.

- Taamaattumik Socialdemokraatit nalunngilaat, uanga "oqimaalutaavimmi aalajangiisunngussagaluaruma", taava isumaqatigiinniartoqartariaqartoq. Politikki isumaqatigiinniarnernik annertuumik imaqarpoq, taamaattumik uanga taaseqataanissara atorfissaqartinneqalissagaluarpat  Kalaallit Nunatsinnut iluaqutissaasunik illuatungaani pissarsinissarput naatsorsuutigineqassaaq, Folketingimi ilaasortaq Aki-Matilda Høegh-Dam Sermitsiap nittartakkatigut nutaarsiassaqartitsivianut oqarpoq.

inuiaqatigiit samfund
Powered by Labrador CMS